Suliffeqarnermut Inuussutissarsiutinullu ilinniartitaanermut Pisortaqarfiup lærlingit aamma sungiusarluni suliffiit pillugit immikkut sammisaralugu radio, tv aviisillu atorlugit suleqatissarsiorneq sapaatit akunnerini makkunani ingerlatilerpaa. Taamatut suleqatissarsiornikkut suliffeqarfiit amerlanerit Naalakkersuisut ilinniartitaanermi annertuumik iliuuseqarnerannut ilanngullugu lærling´inik tigusaqartalernissaat aammalu inuusuttut sungiusarlutik suliffissaqarsinnaanissaat anguniarneqarpoq.
Suleqatissarsiornermi TV-kkut aamma radiukkut maannakkut ingerlanneqartumi oqariartuutigineqarpoq "Qinnuteqaatit inuttut nammineq allaguk oqaloqatiginninnissamullu piareersarlutit". Suleqatissarsiornerup immikkoortuani tassani anguniarneqarpoq inuusuttut ilinniartitaanermut ingerlakkumasaminnut atatillugu sungiusarlutik suliffigisassaminnik nassaarsinnaanissaminnut periarfissarisamik annertunerulernissaannik ilitsersorneqarnissaat.
Suleqatissarsiornerup immikkoortuata aappaa, tassalu radiukkut aviisitigullu ilanngussaqartarnikkut ingerlanneqartoq suliffeqarfinnut sammitinneqarpoq, taakku kajumissaarneqarmata suliffeqarfigisamik saqqumilaartinnissaannik, taamatullu lærling"inik amerlanerusunik suliffeqarfigisaminni tigusaqarsinnaanissamik suliniuteqarnissaannik.
Inuusuttut amerlaqisut meeqqat atuarfianniit soraarummiilerput, taamatullu sungiusarlutik suliffigisassaminnik ujaasisussaalissallutik.
Inuusuttut suliffeqarfiillu qanoq ingerlariaqqinnissartik nalulerlugu imminnut saaqqutiinnannginnissaat siunertaralugu suleqatissarsiorneq ingerlanneqarpoq. Taamaattumik suleqatissarsiorluni ilanngussaasartut pineqartut allakkatigut ilitsersuummik paasissutissiissutinillu malitseqartinneqarput. Ilitsersuut sungiusarluni suliffigisassarsiortunut sammitinneqartoq sinerissami atuarfinnut Piareersarfinnullu nassiussuunneqarpoq, suliffeqarfittullu sungiusarluni suliffigineqartarneq suliffigineqalersinnaanissarlu pillugit paasissutissiissutit sulisitsisut peqatigiiffigisaannut tamanut 2006-imi ukiakkut nassiussuunneqareerlutik. Ilitsersuutit arlariit pineqartut pisortaqarfiup nittartagaaniipput.
Suleqatissarsiorneq pineqartoq paasissutissiilluni arlalitsitigut suliniuteqarnerup 2006-imi novembarimi aallartinneqartup immikkoortuisa ilagaat. Suleqatissarsiornermi tunngaviusumik anguniagaq tassaavoq sungiusarluni suliffissanik amerlanerusunik pilersitsisoqarsinnaanissaa, taamatullu inuusuttut amerlanerusut inuussutissarsiorluni ilinniarnermik aallartitsisinnaanissaat.
Paasisaqarnerorusukkuit attavisiginnaavat Inuussutissarsiornermut, Suliffeqarnermut Inuussutissarsiutinullu ilinniartitaanermut Naalakkersuisoq Siverth K. Heilmann, oqarasuaat +299 52 16 53,
imaluunniit pisortaq Palle Frederiksen, Suliffeqarnermut Inuussutissarsiutinullu ilinniartitaanermut Pisortaqarfik, oqarasuaat +299 48 57 30.