Cairnip qillerilluni angusaa qiimmaallannartoq

Uuliasiorfiutileqatigiiffiup Cairnip Nuup avataani qillerivimmi Atammimmik taagorneqartumi uuliasiorluni qillerinerminit angusaminik nalunaaruteqarnera Naalakkersuisunit qiimmaallannartutut tiguneqarpoq. Angusarli qiimmaallannaraluaqisoq taamaattoq Naalakkersuisut isumalluarpallaarnaveersaarput, tassami immap naqqata iluani sioraqarfiup ilippanaateqartup uuliaqarsinnaaneranik gasseqarsinnaaneranillu misissorluaqqaarneqarnissaa nalilersoqqaarneqarnissaalu utaqqeqqaarneqartariaqarmat.

- Cairnip sioqarfimmik uuliaqarsinnaaneranik ilimanaateqarsinnaasumik nassaarsimanera qularutigineqarsinnaanngitsumik isumalluartitsilerpoq. Qiimmaallannarpoq, kisiannili naammagittaqqaartariaqarpugut tassami sioraqarfik uuliaqarsinnaaneranik gasseqarsinnaaneranillu misissuiffigineqaqqaartariaqarpoq, Inuussutissarsiornermut Aatsitassarsiornermullu Naalakkersuisoq Ove Karl Berthelsen oqarpoq, nangillunilu:

-. Oqaatigisariaqarpoq ukiuni kingullerni marlunni uuliasiorluni qillerinernik arfineq pingasunik ingerlataqarneq maannamut iluatsilluartumik ingerlammat. Cairnip uppernarsarpaa issittup imartaa mianernartoq sianigilluinnarlugu uuliasiorluni qillerinernik arlalinnik ataatsikkoortitsilluni ingerlatsisoqarsinnaammat. Uuliasiorluni qillerinerit maannamut immap naqqanut tunngatillugu paasissutissanik pingaarutilinnik ukiunilu aggersuni nunatta imartaani qillerinissanut atorneqartussanik pissarsiviupput. Maannamut killiffiup uppernarsarpaa uuliasiorniarluni akuersissuteqartarnermut politikki iluatsilluarsimammat, Ove Karl Berthelsen naggasiivoq.

Cairn nunatta kitaata imartaani qillerinerit tallimat 2011-mi ingerlatissallugit pilersaaruteqarpoq, maannamullu Nuup avataani qillerinerit kingulliit marluk ingerlanneqarput. Cairn 2010-mi qillerinernik pingasunik aamma ingerlataqarpoq.