Sanaartornermut suliassaqarfimmi sulisunut avataaneersunut kisitsisit pillugit paasissutissat

Siumut-mi ilaasortaq Malik Berthelsen, Sermitsia mi allaaserisamigut tupigusuutigaa, assassornermik suliaqartut avataaneersut nunatsinni sulisut ikittuinnaammata. Akissuteqaatimali ingerlateqqinnginnerani suliaq naatsumik nassuiaateqarfigissavara:

Malik Berthelsen-ip § 37 naapertorlugu apeqquteqarfigaanga, assassornermik suliaqartut kiisalu niuernermik allaffissornermillu suliaqartut avataaniit nunatsinnut suliartortut 2010-imi aamma 2011-imi qassiusimanersut apeqquteqaatigalugu.

Kalaallit Nunaatta nunat avannarliit suleqatigiinnerannut ilaanera Malik Berthelsen-mut akissuteqarninni ilisimatitsissutigaara, tassungalu atatillugu qallunaat nunaanni peqqussutit atuuttut iluini paragraffit attuumassuteqartut issuaaffigilaassavakka makkuusut:

”Nunanit allamiunut inatsisip Kalaallit Nunaannut atuutsinneqalernissaa pillugu peqqussut nr. 150, 23. februar 2001-imeersoq:

§ 1: Finland-imi, Island-imi, Norge-mi Sverige-milu innuttaassuseqartut akuersissummik peqanngikkaluarlutik Kalaallit Nunaannukarsinnaapput Kalaallit Nunaanniissinnaallutillu”

- kiisalu -

”§ 14, imm. 1, nr. 1: Nunanit allamiut, Finland-imi, Island-imi, Norge-mi Sverige-milu innuttaassuseqartut Kalaallit Nunaanni sulinissamut akuersissummik peqartariaqanngillat.”

Peqqussummi takuneqarsinnaasutut innuttaasut nunani avannarlernit allaneersut immikkut sulinissamut akuersissummik piniaqqaaratik Kalaallit Nunaanni sanaartornermut suliassaqarfimmi suliffinni inuttaqanngitsuni sulilersinnaapput – taamaattorli Inatsisartut inatsisaanni nr. 27 30. oktober 1992-meersukkut Kalaallit Nunaannut suliffissarsiortut killilersimaarnissaat pillugu Inatsisartut inatsisaatigut kalaallinik sulissussanik pissarsisoqarsinnaannginnera tunngavigineqassaaq. Aammalu Namminersorlutik Oqartussat nunanit avannarlerni innuttaasut Kalaallit Nunaanni sulilertarnerannut kisitsisitigut nalunaarsuisanngimmata, tamannarpiaq pissutigalugu assassornermik suliaqartut, nunanit avannarlerneersut sulisut Kalaallit Nunaanni amerlassusaat ilisimanngilarput.

Tunngaviusoq tassaavoq maleruagassat imatut aaqqissuussaammata sulisussat nunani avannarlerni innuttaassuseqartuunngitsut kisimik Kalaallit Nunaanni sulinissamut akuersissummik qinnuteqartussaallutik. Malik Berthelsen-imut akissuteqaatinni aamma allassimavoq sanaartornermi suliaqartut amerlassusaat ilisimatitsissutigineqartut tassaammata nunani avannarlerni innuttaasuunngitsut. Tassa imaappoq innuttaasut Danmark-imi, Finland-imi, Norge-mi, Sverige-mi, Island-imi, Savalimmiuni aamma Åland-imi najugaqartuunngitsut.

Taamattoqareeraluartorli Malik Berthelsen-ip sulisussanik nunaqavissunik sapinngisamik annertunerpaamik atuisoqartarnissaanik kissaateqarnera isumaqatigaara, nunatta killingisa avataanni sanaartornermik suliaqartunik sulisussarsioqqaartariaqassannginnatta.

Aammami kommunit tamatuminnga qulakkeeriniartussamik suleriaaseqarput. Sulisitsisut kommunimi suliffissarsiuussisarfiit attaveqarfigisartussaavaat paasiniarlugu piumasaqaatinik naammassinnissinnaasunik suliffissaaleqisoqarnersoq. Najukkami suliffissamik tigusisinnaasunik suliffissaaleqisoqanngippat sinerissami suliffissarsiuussisarfiit sinnerinut sulisussarsiortoqassaaq. Piumasaqaatinullu piginnaanilimmik sulisussaqanngippat avataaniit sulisussarsisoqarsinnaavoq.

Ilisimatitsissutigissavarattaaq sulisinnaasut suliffissaaleqisut malinnaaffigiuminarnerulernissaannik siunertaqartumik suleqatigiisitaliamik pilersitsisoqarmat.

Suleqatigiissitap suliassaraa suliffissaaaleqisut qassiunerannik, ilinniakkatigullu tunuliaqutaannik qanoq ililluta malinnaaviginninnerusinnaanitsinnik siunnersuuteqassalluni, taamaalilluta sulianut ilinniakkatigut tamatigut nunatsinneersunik sulisussarsisinnaanissarput annertusarniarlugu.

Suleqatigiissitaliap taaneqartup siunnerfigisaannut siunertaasut taamatuttaaq Akileraartarnermut Atugarissaarnermullu ataatsimiititaliap nalunaarusiaanut naapertuuttorujussuuvoq, taassumami taamatuttaaq suliffeqarnermut suliassaqarfitsinni kisitsisitigut paasissutissat atorlugit malinnaanerulernissarput inassutigaa. Tamanna minnerunngitsumik suliassaqarfiup taassuma ukiorpassuarni sumiginnagaasimaneranik tunngaveqarpoq. Isummersorneq taanna tapersersorpara.