Kalaallit Nunaat Sverigelu qanillattorniarsaripput

Sverigep Niueqatigiinnermut ministeria Ewa Björling atorfilittaalu ulluni makkunani nunatsinni tikeraarsimaarput. Angalaqatigiit Sisimiuneeqqammerput kingorna Nuummut ingerlaqqillutik ulluni 29. august septemberip aallaqqaataa 2011 tikillugu maaniillutik.

Angalanerup siunertaa pingaarnerusoq tassaavoq Nunatta Sverigellu akornanni niueqatigiittarnerit, pingaartumik inuussutissarsionerup aatsitassarsiornerullu iluini, siuarsarneqarnissaat.

Inuussutissarsiornerup aatsitassarsiornerullu iluini suliaqartuusut pingaarnerit peqatigalugit Nuummi isumasioqatigiinneq ingerlanneqarpoq. Tassani nunatsinni aatsitassarsiorniarnerup killiffia, aatsitassarsiornerni avatangiisinut tunngassuteqartortai, erngup kuuttup pilersitaa nukik atorlugu nukissiorneq, nunatsinni sanaartornerup killiffia kiisalu alumiiniumik aatsitsiviliorniarnermi suliniutip killiffia svenskinut angalaqatigiinnut saqqummiunneqarlutik. Angalaqatigiit aamma periarfissinneqarput nunatsinni suliffeqarfiit sammisanut attuumassuteqartut aallartitaannik naapeqateqarnissamik, taamaalilluni suleqatigiissutigineqarsinnaasut oqaloqatigiissutigineqarsinnaallutik.

- Sverige aatsitassarsiornernik, ujarlernernik tunisassiornernillu, ingerlataqarnernik ukiorpassuarni misilittagaqarpoq. Taamaattumik tamakkua tungaatigut nunatsinniit Sverigemik suleqateqarnissaq orniginartuuvoq. Suleqatigiissutigineqarsinnaasut tassaasinnaapput aatsitassarsiornermi pisortat aqutsinerannik misilittakkat aveqatigiissutigisarnissaat, nakkutilliinermut tunngassuteqartut kiisalu aatsitassarsiornerup iluani ilinniartitsisarnerit suleqatigiissutigineqarsinnaallutik. Imaassinnaavoq aamma qulequttat allat suleqatigiissutigineqarsinnaalluartut, Inuussutissarsiornermut Aatsitassanullu Naalakkersuisoq Ove Karl Berthelsen oqarpoq.

Kalaallit Nunaat Sverigelu Issittumi Siunnersuisoqatigiinni ilaasortaaffeqarnertik aqqutigalugu suleqatigiinnernik ingerlatsisareerput.

- Issittumi Siunnersuisoqatigiinni suleqatigiilluarnerput ingerlateqqissavarput aammalumi suleqatigiiffinni allani Issittumi ineriartornernerup piujuartitsinermik tunngaveqartumik ingerlanneqarnissaa qulakkeerniarlugu paasineqarluarsinnaasunik sinaakkusiornissat ingerlatissavagut, Ove Karl Berthelsen naggasiivoq.

Nunatsinni tikeraarnerup nalaani svenskit angalaqatigiit Sisimiuni Nukissiorfiit, Sanaartornermik Ilinniarfik kiisalu Nuup eqqaani Isuani London Mining-ip saviminissarsiorfissaliorniarluni suliniuteqarfia alakkarterpaat.