Aatsitassarsiornerup avatangiisinut tunngasortaa misissorluarneqarpoq

Aatsitassanut suliassaqarfiup avatangiisinut tunngasortaata oqartussaasunit suliarineqartarnera ulluni makkunani tusagassiuutitigut oqallisigineqangaatsiarpoq.

Erseqqissarneqassaaq Naalakkersuisut suliassaqarfimmi politikki allanngortinngimmassuk aammalu iliuusissanut pilersaarut Naalakkersuisut akuerisimasaat malikkatsigu.

Naalakkersuisut sinnerlugit matumuuna erseqqissassavara, Naalakkersuisut Qoornumi isumaqatigiissut juulimi 2010-imeersoq naapertorlugu piffissap qinigaaffiup matuma ingerlanerani suliassaqarfiup misissorluarneqarnissaa aallartissimammassuk. Tamatumani aatsitassanut ikummatissanullu inatsisip aammalu Kalaallit Nunaanni Danmarkimilu inatsisit aalajangersimasut naleqqussarneqarnissaat kiisalu naalagaaffimmut isumaqatiginninniaqqaarsimanissaq pisariaqarput. Aaqqiissutissat Namminersorneq pillugu inatsimmut, nunavittamut inatsimmut aammalu danskit imaani avatangiisinut inatsisaannut tulluaqqissaanngitsut ingerlanneqannginnissaat aalajangiisuulluinnartumik pingaaruteqarpoq. Inatsisinik allannguiniarneq suliassaavoq imaannaanngitsoq, aatsitassarsiornermut suliassaqarfiup avatangiisinut tunngasortai tamarmik sukumiilluinnartumik misissorluarneqarnissaat pisariaqarluni.

Aatsitassanut ikummatissanullu inatsimmut inatsisinullu allanut allannguutissatut siunnersuut Inatsisartuni immaqalu aamma folketingimi 2012-imi ukiaanerani suliarineqassasoq naatsorsuutigineqarpoq, tamatumalu kingorna allannguutit 2013-imiit atuutilersinnaassallutik.

Tassunga atatillugu Inatsisartut aamma siunnersuutip malitsigisassaannut aningaasaliissuteqaqqinnissamut pisariaqartitsinermut matussusiinissaq isummerfigisussaavaat. Oqartussaasut suliarinnittarnerisa immikkoortortanut arlalinnut aggulunneqarnissaa aamma, aatsitassarsiornermut suliassaqarfimmi ingerlatat maannakkut annertussusaat attatiinnarneqassappat, atorfiit akuerisaasut amerlineqarnissaannik pisariaqartitsilernermik kinguneqanngitsumik pisinnaassanngilaq.

Piffissaq qinigaaffiusoq naatinnagu aatsitassarsiornerup avatangiisillu ataqatigiinnerisa naleqqussarneqarnissaat pillugu Qoornumi isumaqatigiissummi siunnerfiusut Naalakkersuisut aalajangiusimavaat. Tassunga atatillugu ilisimatusarnermik aallaaveqartumik ilisimatusarnermut sullissivinnit arlaannaannulluunniit attuumassuteqanngitsunit avatangiisinut tunngatillugu siunnersuisarnerup tunngaviusumik ingerlanneqartarnerata aalajangiusimaannarnissaa Naalakkersuisut qitiulluinnartumik pingaartippaat.

Qulequttap Inatsisartuni ukiaanerani ataatsimiinnissami matumani oqallisigineqarnissaa qilanaaraarput, neriuutigalutigu aatsitassanut ikummatissanullu inatsimmi pineqartunut ilaasut imaannaanngitsorpassuit tamanut iluaqutaasumik paasinarsisinneqarumaartut.

Inussiarnersumik inuulluaqqusillunga

Ove Karl Berthelsen

Inuussutissarsiornermut Aatsitassanullu Naalakkersuisoq