Aluminiu pillugu suliniutip ineriartortinnissaanut pilersaarut

Ottawa-mi ICC-ip Leaders´ Summit-ertsineranut atatillugu Naalakkersuisut peqataanerat iluatsillugu Naalakkersuisuni suleqatigiisitap, aluminiu pillugu suliniummut atatillugu Alcoa ataatsimeeqatigisimavaat. Naalakkersuisuni suleqatigiisitaq ukunanit inuttaqarpoq Naalakkersuisut siulittaasuat Kuupik Kleist aammalu Naalakkersuisut Jens B. Frederiksen, Anthon Frederiksen kiisalu Ove Karl Berthelsen.

Suliniutip killiffiat illuatungeriit oqallisigisimavaat, tassungalu atatillugu aamma Alcoa-mit ilisimatitsissutigineqarsimapput nunarsuarmi sumiiffinni allani maannakkut suliniutinik ineriartortitsiffigisatik.

Kalaallit Nunaanni suliniut piviusunngortinneqassappat, taava pisariaqarpoq nunat tamalaat akornanni unammillersinnaassuseqarnissaq. Tassungalu atatillugu maannakkumut misissuinerugallartut ersersissimavaat, Kalaallit Nunaanni sanaartornissamut aningaasartuutissat nunanut allanut sanilliullugit qaffasippallaarujussuartut. Suliniutip ingerlatiinnarneqarnissaa siunertaralugu ineriartortitsisoqassappat Alcoa-p pisariaqarsorivaa illuatungeriit nalilersueqatigiittariaqartut assigiinngitsutigut qanoq aningaasartuutaasinnaasut appasinnerutissinnaaneri pillugit isummersoqatigiinnikkut. Aammattaaq pisariaqarpoq erseqqissunik piumasaqaatinut sinaakkusiortoqarnissaa, sutigut Kalaallit Nunaata neqerooruteqarsinnaanera aammalu neqerooruteqarusunnera ersersikkumallugu. Tamatumani ilaatigut assersuutigineqarsinnaapput; sanaartornerup nalaani piumasaqaatit suut atuutissanersut suliffeqarfinnut nunanit allaneersunut aammalu suliartortitanut, akileraartarnermut aammalu akitsuusiisarnermut minnerunngitsumillu inissanik sanaartornermut, aqquserniornermut, umiarsualiviliornermut il.il. illuatungeriit akisussaaffiisa ersersinneqarnissaat. Tamakkulu saniatigut soorunami aamma Kalaallit Nunaanni inuussutissarsiornermi ineriartortitsilluaqataasinnaanissaa.

Naalakkersuisut Alcoa-lu isumaqatigiipput, Kalaallit Nunaanni suliffeqarfiit sulisinnaassutsillu sapinngisamik annertunerpaamik atorneqartariaqarnera. Tamatumani pingaartinneqarpoq sanaartornerup nalaaniinnaanani aammali ingerlatsinerup nalaani. Taamatut qulakkeerinninniarsinnaaneq pillugu ataatsimiinnermi periaatsit assigiinngitsut oqallisigineqarput. Tamatumalu kingorna Naalakkersuisut Kalaallit Nunaanni sulititsisut kattuffii aammalu SIK naapinniarneqarput oqallisigineqartunut akuutinnissaat qulakkeerniarlugu.

Politikkikkut ingerlatsinissaq pillugu aamma Naalakkersuisut pilersaarutiminnik saqqummiussisimapput, kingusinnerusukkut Inatsisartut ukiakkut 2011-imi ataatsimiinnissaannut suliniut pillugu piumasaqaatinut sinaakkutissat politikkikkut isummerfiginissaanut toqqammavigineqarumaartut. Kingusinnerusukkullu pilersaarutigineqarpoq tunngaviusumik politikkikkut isummertoqarumaartoq suliniummi piginneriaaseq pillugu Inatsisartut upernaakkut 2012-imi ataatsimiilerpata.