Nunani Avannarlerni Ministerit Siunnersuisoqatigiivi Kujataalialerput

Nunani Avannarlerni Ministerit Siunnersuisoqatigiivini atorfillit ataatsimiititaliaat marluk 2-7. september Kujataalialerput. Ataatsimiititaliat tassaapput Inuussutissarsiornermik Ineriartortitsinermut Nunallu Immikkoortuinik Ineriartortitsinermut tunngasunik sammisallit.

Ataatsimiinnermi immikkut oqaluuserineqassapput Issittumi takornariaqarneq aamma nunap immikkoortuini unammilligassat. Ataatsimiinnermi Issittumi inukittuni inuussutissarsiornikkut ineriartortitsisinnaaneq pillugu arlalinnik oqalugiartoqassaaq, ataatsimiititaliallu marluusut aallartitaannut oqalugiartoqarluni. Oqalugiartussat ilaatigut ilagaat Kalaallit Nunaanni Takornariaqarnermi Inuussutissarsiornermilu Siunnersuisoqatigiinni atorfilik Mads Nordlund, taannalu Issittumi imminut akilersinnaasumik takornariaqarneq pillugu saqqummiussissaaq, kiisalu NORA-meersoq Lars Thostrup, taassuma oqalugiaatigissavaa nunap immikkoortuini ineriartortitsinermi takorluukkat (Nunani Avannarlerni Killerni Nordisk Ministerrådip ataaniittumik nunat killeqarfii akimorlugit suleqatigiinneq).

Aallartitat tikeraarnerminni Narsarsualiassapput, Igalikuliassapput Qaqortumukarlutillu, taakkunanilu ilaatigut makkua takuniassavaat:

• Ipuitaq Guest Farm (Igalikup silatinnguaniittoq): Savaateqarfiusimasoq, takornarissanut unnuisarfiliarineqarsimasoq, taassuminnga piginnittut kalaaliminernik franskit nerisassioriaasiat malillugu nerisassiarineqarsimasunik tikeraartiminnut neqerooruteqartarput.
• Great Greenland: Atisanik nunani tamalaani piumaneqarnerpaanik tunisassiorfik Issittumi avinngarusimasumi inissisimasoq. Atisanik nunani tamalaani piumaneqarnerpaanik tunisassiortuulluni Issittumilu inissisimalluni sunik iluaqutissartaqarpa?
• Upernaviarsuk, Kalaallit Nunaanni Namminersorlutik Oqartussat misileraaviat nunalerinermilu inuussutissarsiuteqarnermi ilinniarfik. Issittumi naatitanik qaffasissumik pitsaassusilinnik ineriartortitsinermi sunik immikkut ittunik periarfissaqarpa?

Ataatsimiititaliat Kujataani ataatsimiinnissaanni Inuussutissarsiornermut Sulisoqarnermullu Naalakkersuisoqarfimmit aamma Ineqarnermut, Attaveqaqatigiinnermut Angallannermullu Naalakkersuisoqarfimmit sinniisunik peqataasoqassaaq.