Naalakkersuisut uran pillugu namminneerlutik paasissutissiiniarput

Aviisi Kuannersuit News angerlarsimaffinnut tamanut qanittukkut agguaanneqarpoq. Tassunga atatillugu Naalakkersuisut erseqqissaatigissavaat aviisi Kuannersuarni aatsitassarsiornissamik suliniummik ingerlatsisunit, Greenland Mining Energy-kkunnit, tamakkiisumik suliarineqarnikuummat.

Naalakkersuisut pilersaarutigaat uran-italinnik aatsitassarsiornernut tunngassuteqartunik innuttaasunut paasissutissiissuteqassallutik. Nalunaarusiamik arlaannaannulluunniit attuumassuteqanngitsunit ilaatigut GEUS-ikkunnit DMU-meersunillu suliarineqartumik qaammatip matuma ingerlanerani saqqummertoqassaaq. Nalunaarusiami tassani uran-italinnik aatsitassarsiornermi avatangiisinut peqqissutsimullu tunngassuteqartut ilaatigut sammineqassapput.

Aamma qaammatip matuma naajartornerani TV-kkut aallakaatitassiaq ilisimatusarfeqarfiit siuliani taasaneqartut peqataaffigisaannik aamma takusassiisoqassaaq. Aallakaatitassiami tassani uran-italinnik aatsitassarsiorsinnaanernik akerliusut tapersersuisullu isumaminnik tunngavilersuillutik saqqummiisinneqassapput.

Namminersorlutik Oqartussaneersut aammalu Kommune Kujallermeersut angalaqatigiit september-imi Canadamut angalatinneqassapput uran-italinnik aatsitassarsiorfimmut paasisassarsiortinneqassallutik kiisalu canadamiut misilittagaannik saqqummiiffigineqassallutik.