Qasigiannguani aalisakkanik tunisassiorfimmi sulisut amerlineqartussanngorput

Qasigiannguani aalisakkanik tunisassiorfik aalisakkanik suliareqqiisarnernik annertusaalluni december 2010 aallartissaaq. Tamatuma kingunerissavaa sulisussanik amerlanerusunik pisariaqartitsineq. Kalaallit amerlanerusut sulilersinneqarnissaat qulakkeerniarlugu ataatsimoorluni sammivilersukkanik suliniuteqarnissat aallartisarneqartussanngorput. Kommunit suliffissaaleqiffiunerusut sulisussarsiorfigineqartussanngorput aamma suliffissaqarfiusunut nuunnissamut aningaasaateqarfiup tapiissutigisartagaasa annertunerusumik atorneqarnissaat sulissutigineqalerpoq.

Tamakkuupput Inuussutissarsiornermut Suliffeqarnermullu Naalakkersuisoq Ove Karl Berthelsen, atorfilittai, Qaasuitsup kommuniata borgmesteria Jess Svane, atorfilittai, SIK-meersut Royal Greenlandimeersullu qaammatip matuma qiteqqunnerani Qasigiannguani innuttaasunittaaq iluatsilluartumik ataatsimeeqateqarnikkut isumaqatigiissutigineqartut.

- Isumaqatigiissutigisavut assut iluarisimaarpakka. Isumaqatigiissutigineqartut takutippaat susassaqartut tamarmik isumaqatigiissusiornissaq siunertaralugu suligaangata tamatsinnut iluaqutissanik angusaqartoqartartoq, Inuussutissarsiornermut Suliffeqarnermullu Naalakkersuisoq Ove Karl Berthelsen Qasigiannguani isumaqatigiissutigineqartut pillugit taama oqarpoq.

Qasigiannguani aalisakkanik tunisassiorfik ullumikkut 85-inik sulisoqarpoq aalisakkanillu suliareqqiinerit ukiup naajartornerani aallartinneqariarpata sulisut 20-30-llu akornanni amerlanerulersinneqarnissaat pisariaqassaaq.