Aningaasalersuinissamik EU-mut isumaqatigiissut ilinniartitaanikkut iliuuserisanut aningaasaliiffiuvoq

Aningaasalersuinissamillu isumaqatigiissut maanna atsiorneqareermat EU-mit tapiissutit Nunatsinnut akiliutigineqassapput, taamatullu Nunatsinni ilinniartitaanermik pitsaanerusumik iliuuseqarnermut pingaarutilimmik iluaqutaassallutik.

Peqatigiinnissamik isumaqatigiissut EU-p aamma Nunatta akornanni 2006-imi aasaanerani isumaqatigiissutigineqarpoq, kinguneraalu Nunarput EU-p missingersuutaanit tapiissutisiaasartunit ukiumut 195 mio. kr.-nit missaannik pissarsisarmat. Aningaasat pineqartut tamarmik Naalakkersuisut ilinniartitaanikkut immikkut ittumik iliuuseqarnissamut missingersuutaannut atugassiaapput; ilinniartitaanermut pilersaarummut. Isumaqatigiissut EU-up aalisarsinnaatitaaneranut isumaqatigiissummut attuumassuteqarpoq.

Nunatsinni innuttaasut ilinniartitaanerat Inatsisartut 2004-mi ukiakkut ataatsimiinneranniilli immikkut sammineqarnerulerpoq. Anguniagaq tassaavoq Nunatsinni innuttaasut 2/3-iisa piginnaasaqarfigilikkaminnik 2020-mi ilinniagaqalersimanissaat. 2012-ip tungaanut immikkut sammineqartussat tassaatinneqarput inuusuttunut ilinniartitaanerit aammalu suliamik ilinniagaqarsimanngitsut 50-it inorlugit ukiullit. Anguniagaq angusaqarfigiumallugu iliuusissat aallartinneqareerput, ilaatigut pineqarlutik ilinniakkamik tamaatitsiinnartarnernik akiuinissaq, ilitsersuillunilu aqqutissiuussisarneq pitsaanerusoq, inuussutissarsiutinik ingerlataqartut aamma qitiusumik ilinniarfiit akornanni suleqatigiinerit pitsaanerusut, kollegialiortiterinerit aammalu kommunini ilitsersuisarfiullutillu aqqutissarsiuussisarfinnut, Piareersarfinnut, tapersiinissaq.

Pineqartoq pillugu sukumiisumik nittartakkami uani aamma atuarsinnaavutit:

http://dk.nanoq.gl/sitecore/content/Websites/nanoq/Emner/Borger/Skole_og_uddannelse/Tema_om_uddplan.aspx