Alumiiniumik aatsiterivissaq Maniitsumut inissinneqarli

Naalakkersuisut Inatsisartunut ullumi innersuussutigaat alumiiniumik aatsiterivissaq piviusunngortinneqassappat Maniitsumut inisseqqullugu.

Inissiivissatut siunnersuutigineqarpoq sumiiffik Maniitsup qeqertaata avannamut kitaaniittoq kommunip inissiivissatut siunnersuutigisaa C-mik taaguuteqartinneqartoq.

Kommunit pingasut Sisimiut, Maniitsoq Nuullu alumiiniumik aatsiteriviliortoqassappat inissiivissatut siunnersuutinik pingasunik immikkut tamarmik siunnersuusioqqullugit siornali piumaffigineqarsimapput. Naalakkersuisut inissiivigineqarsinnaasutut innersuussuteqarnerminni pissutsit assigiinngitsut isiginiarsimavaat, soorlu sanaartornermut aningaasartuutaasinnaasut, avatangiisinut tunngatillugu apeqqutit kiisalu nunatta immikkoortuisa ineriartortinneqarnissaannut tunngassuteqartut.

Alcoa-p Greenland Development-illu naatsorsuusiaasa qularnaatsumik paasinarsisippaat Maniitsup eqqaani inissiivissatut siunnersuutigineqartoq imminut akilersinnaanerpaajussasoq.

Aamma avatangiisinut sunniutaasinnaasussat pillugit nalilersuinerit takutippaat Maniitsup eqqaani inissiinissaq allanut inissiivissatut siunnersuutigineqartunut sanilliullugu isumannaannerpaajussasoq. Erngup nukissiorfiliornissat, avatangiisinut allanullu sunniutissaasinnaasut sukumiinerusumik paasisaqarfiginiarlugit misissuinerit 2008-mi 2009-milu ingerlateqqinneqassapput.

- Alumiiniumik aatsiteriviliortoqaraluarpat Kalaallit Nunaata aningaasarsiorneranut inuussutissarsiutillu ineriartortinneqarnerannut tamanna suli annerusumik ilorraap tungaanut saatitsinermik kinguneqartitsissagaluarpoq aningaasarsiornikkut nammineersinnaanerulernermik nassataqartitsilluni. Suliffippassuit pilersinneqassapput aamma ilinniartitaanertigut aaqqissuussinivut unammillerneqassapput, Inuussutissarsiornermut, Suliffeqarnermut, Inuussutissarsiutinullu Ilinniartitaanermut Naalakkersuisoq, Siverth K. Heilmann, innersuussinermut atatillugu taama oqaaseqarpoq.

Ilanngullugu Naalakkersuisunut ilaasortap Siverth K. Heilmann-ip oqaatigaa Alcoa piumaffigineqarsimasoq nunatsinni aatsiterivimmik pilersitsiniassaguni atortorissaarutit nutaaliaanerpaat avatangiisinullu mingutsitsinnginnerpaajusut atorlugit aatsaat pilersitsiniaqqullugu. Taama piumasaqaateqarneq Alcoa-mit akuersaarneqarluni paasilluarneqarsimavoq.

Naalakkersuisut nalilersuinerminni aamma ilanngullugu eqqarsaatigisimavaat Maniitsoq, siunnersuusioqquneqartuni illoqarfittut mikinerpaajusoq, inuussutissarsiornikkut pilersaarummik taama annertutigisumik ilumut kivitsisinnaassanersoq. Tassami Maniitsumi aatsiterivimmik pilersitsisoqassappat Maniitsoq Sisimiutullu inuttussuseqaleriaannaammat.

Kalaallit Nunaanni Sisimiut siuariartorfiulluni ilinniarfeqarfiuvoq. Nuuk illoqarfiit pingaarnersaraat allaffissorfiullunilu. Alumiiniumik aatsiterivik Maniitsumi pilersinneqassappat Maniitsoq suliffissuaqarnikkut, aatsitassarsiornikkut aammalu nukissiuuteqarnikkut qitiusumik eqiteruffiulissaaq.

Suliniut Inatsisartuni 2009-mi akuersaarneqassappat tamanna qeqqani kommunerujussuanngortussamut atortulersuutitigut pilersitsiortuinissamik, inissialiornernik, suliffeqarfinnik allanik, kulturikkut periarfissiissutinik, sunngiffimmi sammisassanut periarfissiissutinik assigisaannillu pilersitsiortornissamik piumasaqaatitaqassaaq.

Piginneriaasissanik nalilersuinerit

Naalakkersuisut Inatsisartunut ilanngullugu innersuussutigaat suliami ingerlariaqqinnissamut tunngatillugu Alcoa-mik piginneqateqarnissaq anguniaqqullugu. Tamatuma kingunerissavaa Namminersornerullutik Oqartussat Alcoa-lu peqatigiillutik erngup nukissiorfii, innaallagissap ingerlaarfii ledningersuit kiisalu aatsiterivissaq piginneqatigiillutik pigissagaat.

Piginneriaasissamik kiisalu piginneqatigiissutit annertussusissaannik aalangiineq Namminersornerullutik Oqartussat aningaasaliissutissaasa annertussusissaannut aalangiisuulluinnassapput. Aalangernerullu kingunerisaanik aningaasatigut annaasaqaatigineqarsinnaasut annertussuserisinnaasaat taamaalilluni aamma takujuminarnerusinnaalissalluni. Piginneriaaseq piginneqatigiinnerusoq iluaqutissartaqarlunilu ajoqutissartaqarpoq, tamakkulu tamarmik piffissami aggersumi periarfissanut allanut sanilliussisarluni sukumiilluinnartumik misissuiffigineqassapput.

Tamatuma kingorna Inatsisartut piginneriaasissamik aalangiisinneqassapput.

Pilersaarutit malillugit ingerlasoqassappat alumiiniuliornermik tunisassiorneq 2014-ip naalernerani aallartinneqassaaq.