Inuussutissarsiorfiit

Nunami namminermi inuussutissarsiutinik siuarsaanermut suliniarnerup ilusissaa nutaaq Naalakkersuisut 2011-imi novembarimi akuersissutigaat. Nutaamik ilusiliineq ’siuarsaanermut suliniutaasa ataatsimoortitat’ ataatsimoortut ilaattut isigineqassaaq, taannalu Kalaallit Nunaanni inuussutissarsiutinik ineriartortitsinermut killiliussassanut atugassarititaasut pitsaanerulernissaat qulakkeerniarlugu, UPA2012-imi nassuiaatitut aammalu immikkut inatsisiliornerit pillugit suliniutitut iluseqartillugit saqqummiunneqassasoq naatsorsuutigineqarpoq.

Siunnersuummut periusissatigut siunnerfiusoq tassaavoq nunami namminermi inuussutissarsiutinik siuarsaanermik suliniuteqarnermut pisariinnerusumik, ullutsinnut naleqqunnerusumik sunniuteqarluarnerusumillu ilusiliinissaq. Nunap immikkoortuini ineriartortitsinissamut periusissaq pillugu nassuiaammi taamaalilluni naliliisoqarpoq, inuussutissarsiutinut siuariartorfiusunut, aatsitassarsiornermut, nukissiuutinik annertuumik atuiffiusumik suliffissuaqarnermut aammalu takornariaqarnermut naleqqiullugu sammiveqarnerusumik inuussutissarsiutinik siuarsaanermi suliniartoqarnissaa pisariaqartinneqartoq. Nutaamik ilusiliinermi pisariaqartitsineq taanna naammassineqassaaq aammalu inuussutissarsiutit siuariartorfiusut nutaat taakkua Kalaallit Nunaanniitinnissaannik sulisussallu nunaqavissut peqataatinneqarnerulernissaannik qulakkeerisooqataassalluni.

Siunnersuummi matumani aaqqissuussaanikkut aningaasaqarnikkullu aningaasaliissutit immikkoortinneqartut naleqqunnerusumik atorneqarnissaat qulakkeerneqassaaq, inuussutissarsiutinut nunami ingerlanneqartunut takornariaqarnermullu, ilanngullugit suliniuteqarfiusussat ataasiakkat, ineriartortitsinermut tapersiissutit tamarmiusut ataqatigiissaagaanerusumik pitsaanerusumillu ingerlanneqarnissaat qulakkeerneqassaaq, kiisalu killissaliussanut atugassarititaasunik pitsaanerusunik pilersitsinikkut naalakkersuinikkut anguniakkat naammassineqassallutik.

Nunami namminermi inuussutissarsiutinik siuarsaanermut suliniarnerup ilusissaa nutaaq.