Tallimassaanik kingullermillu Avatangiisit Pinngortitarlu pillugit nersornaasiineq 2011

Namminersorlutik Oqartussat 2011-mi Avatangiisinik Pinngortitamillu Mianerinninneq pillugu akissarsititsinissaasa tallimassaat kingullersaallu ataasinngorpat februaarip 6-ani 2012 Hotel Arctic-imut tunniunneqassaaq. Akissarsititsineq pissaaq Hotel Arctic-imi nalunaaqutaq sisamanut. Tusagassiorfiit tikilluaqqusaapput.

Akissarsiaq 20.000 kr.-inik naleqartoq qulequtaqarpoq ”Nukimmik atorluaanissamik suliniutit aamma avatangiisinik pitsanngorsaataasumik nukimmik ataavartumik atuineq”.

”Ilulissani Hotel Arctic ukiorpassuarni avatangiisimik mianerittuusimavoq. Nunatsinni hotelini kisiartaalluni Horestap avatangiisimut allagartamik tunniuttagaanik ”The Green Key”-mik pissarsinikuuvoq. Hotelip avatangiisimut politikia ukiut ingerlanerini ingerlaavartumik inerisarneqarpoq, 2010-milu hoteli annertuumik alloriaqqippoq, tassa nalunaarusiaq ”Nukimmik pitsanngorsaaneq Hotel Arctic”, ilaatigut ingerlatsinikkut sipaarnernik immikkoortunilu arlalinni CO₂-mik annikillisaanernik nassuiaateqartoq. Taamaalilluni 2011-miit hotelip CO₂-mik ajoqusiisinnaanini 106 tonsinik innaallagiamillu atuinini 23 %-mik annikillisippai. Hotelillu illuutai tallimat, hotelimut ilisarnaatalersimasut ingerlaavartumik nutarterneqartartut, naggataatigut kiassarnermut innaallagiamullu seqernup qinngorneri kisimik atorneqalissallutik. Illu siulleq 100 %-imik seqernup qinngorneranit nukimmik atuilereerpoq.” Nunamut Namminermut, Pinngortitamut Avatangiisinullu Naalakkersuisup Anthon Frederiksenip Hotel Arctic-imut akissarsititsineq taama tunngavilersorpaa.

Inuit, suliffeqarfiit kattuffiilluunniit tamatsinnik pinngortitamik avatangiisimillu mianerinninnissatsinnik ilisimaarinnilersitsisut imaluunniit Kalaallit Nunaanni suliniuteqarnermikkut avatangiisitsinnik pitsanngorsaataasumik iliuuseqarsimasut nersorniarlugit akissarsiaq tunniunneqartarpoq.

2011-mi Avatangiisinik Pinngortitamillu Mianerinninneq pillugu akissarsiaq immikkoortunut marlunnut agguarneqarpoq:

• ”Ilisimatitsinikkut avatangiisinik paasisimasaqarnerulersitsineq”
• ”Nukimmik atorluaanissamik suliniutit aamma avatangiisinik pitsanngorsaataasumik nukimmik ataavartumik atuineq”

2011-mi akissarsisut siulliit tassaapput Niels-Henrik Lynge, Tasiusaq vandrehjem Jørgine aamma Otto Frederiksen-imit aqunneqartoq, Carsten Egevang aammalu Mogens Bisgaard Kofoed.