Aaqqissuussaanermut Isumalioqatigiissitaq

Aaqqissuussaanermut Isumalioqatigiissitap ukiaq 2005 "Pisortat suliassaqarfiinik aaqqissuusseqqinnissaq pillugu isumaliutissiissut" Naalakkersuisunut tunniuppaa. Taamaalilluni isumalioqatigiissitap suliani naammassivaa isumalioqatigiissitarlu taamaalilluni atorunnaarpoq.

Pdf.-inngorlugu takusinnaavatit:

• Pisortat suliassaqarfiinik aaqqissuusseqqinnissaq pillugu isumaliutissiissut.
• Pisortat suliassaqarfiinik aaqqissuusseqqinnissaq pillugu isumaliutissiissummut ilanngussat (bilag).

Isumaliutissiissutip siulequtaanit tigulaarineq:

Aaqqissuussaanermut Isumalioqatigiissitat pilersinneqarnerat suliassaallu

December 2003-mi Naalakkersuisut aaqqissuussaanermut isumalioqatigiissitaq pilersippaat, suliakkiunneqarporlu pisortat suliffeqarfiutaanni tamani suliassat naammassineqarnissaannut killiliussat allanngortinnissaasa aalajangiiffigineqarnissaannut tunngavissat teknikikkut suliatigullu misissoqqissaarnissaat.

Aaqqissuussaanermut Isumalioqatigiissitat tunngaviusumik pingaartitassatut naleqartitat aallaavigalugit
pisortat suliffeqarfiisa allatut ilusilerneqarnissaasa pitsaaqutai pitsaanngequtaalu naliliivigissavai taakkulu
tunngavigalugit ukiorpassuarni atasinnaasunik allannguutissanik kaammattuuteqassalluni.

Kommunit killeqarfii pioreersut akimorlugit suleqatigiinnissanut assigiinngitsunut kiisalu kommunit kattunnissaminnik aallartitsinissaannut periarfissanut ikorfartuutaasussat misissueqqissaarnerit ingerlanneqassapput siunnersuutillu saqqummiunneqassallutik.

Tamatumunnga atatillugu aaqqissuussaanermut isumalioqatigiissitaq piumaffigineqarpoq:

1. pisortat ingerlatsineranni nammagassat suliassallu agguataarneranni allannguutissanut periarfissat
   assigiinngitsut pitsaaqutaat pitsaanngequtaallu naliliivigeqqullugit
2. periarfissat assigiinngitsut aallaavigalugit nunap suatungaaniinnermut innuttaqassutsimullu
   tunngasut suut, matumanittaaq kommunit qanoq angitiginissaat, siunissami kommuninik aaqqissuussinissamut tunngaviutittariaqarnersut naliliivigeqqullugit siunnersuusiorfigeqqullugillu.

Kommunit suliassaminnik aaqqissuussinerat naammassinninnerallu qanimut oqartussaaqataanermut
ikorfartuutaassaaq, innuttaasullu nunaqarfinni illoqarfimmiluunniit najugaqarpata pitsaasumik sullinneqarnissaannut qularnaarissallutik. Kommunit suliassaatiminnik pitsaasumik naammassinninnissaanni anguniakkatut aalajangiussimasat pitsaanerpaamik akikinnerpaamillu
anguneqarnissaat pineqarpoq. Tamatumunnga tunngavissaatitaapput kommunip aaqqissuussaanerata
suliffittut kajuminnartuunissaa, piginnaasatigut ineriartornissamut qulakkeerisuunissaa sulisunillu
sivisunerusumik suliffiusinnaanissaa.

Innuttaasut nunami sumi najugaqaraluarunilluunniit imminnut tunngasunik suliarititaqartut pisortani oqartussaasumit sorlermit sullinneqaraluarunilluunniit assigiimmik pineqartussaatitaapput. Kommuninik iluarsaaqqinnermik suliaqarnermi tunngaviulluinnartariaqarput inatsisitigut innarlitsaalineqarnissaq assigiimmillu pineqartussaatitaaneq, aamma aalajangeeqataasinnaatitaasannginnerup
ajornartorsiutaasarnera ilanngullugu. Naalakkersuinikkut allaffissornikkullu kommunini ilusiliinerup misissueqqissaarfigineqarneranni paasissutissiisarnermi teknologiip atorneqarnera
ilanngunneqassaaq.

Aaqqissuussaanermut isumalioqatigiissitaq sulinermini pisussaatitaavoq suliani pillugit Inatsisartunut,
Naalakkersuisunut, kommuninut innutaasunullu paasissutissiisarnissamut. Aaqqissuussaanermut isumalioqatigiissitaq inuiaqatigiinni aalajangiisartut naalakkersuinikkut tunaartassatut tikkuagaat naapertorlugu sulisinnaajumalluni naalakkersuinikkut piginnaatitaanissaminik ujartuisassaaq. Tamanna assersuutigalugu pisinnaavoq 2004-p aamma 2005-ip qiteqqunneranni nalunaarusiortarnikkut. Sammisassat assigiinngitsut pillugit oqallissaarusiortoqartarsinnaavoq.

Aaqqissuussaanermut Isumalioqatigiissitat isumaliutissiissutaat politikkikkut malinnaatitanut tunniunneqassaaq septembarimi 2005, kingornalu kommuninut Borgmesterit kommunaldirektørillu oktobarimi ataatsimiinneranni. Tamatuma kingorna isumaliutissiissut kikkunnilluunniit oqallisigineqarsinnaassaaq Inatsisartut upernaakkut 2006-imi ataatsimiinnissaanni saqqummiunneqarlunilu aalajangiivigineqannginnermini.

Aaqqissuussaanermut Isumalioqatigiissitat ima inuttalersorneqarput, siulliit pingasut KANUKOKA-mit
toqqagaallutik sinnerilu marluk Namminersornerullutik Oqartussat toqqagaralugit:

• Martha Labansen, KANUKOKA-mi pisortaq (siulittaasoq)
• Hans-Peder Christensen, Aasiaat kommunianni pisortaq
• Nukaaraq Eugenius, Toornaq Consulting ApS-imi siunnersorti
• Jens K. Lyberth, Naalakkersuisut Allattoqarfianni pisortaq
• Peter Beck, Aningaasaqarnermut Pisortaqarfimmi pisortaq

Aaqqissuussaanermut Isumalioqatigiissitat sulinerannik politikikkut malinnaatitassanik pilersitsisoqarpoq
ukuusunik:

• Hans Enoksen, Naalakkersuisut siulittaasuat
• Josef Motzfeldt, Aningaasanut nunanullu allanut Naalakkersuisoq
• Agnethe Davidsen, Nuup Kommuniani borgmesteri
• Jens Lars Fleischer, KANUKOKA-mi siulittaasoq 2005-imi siulersuisunik qinersinissap tungaanut
  ilaasortaasoq, kingornalu taarserneqarluni KANUKOKA-p siulittaasortaavanit Lars Karl
  Jensen-imit.

Aaqqissuussaanermut Isumalioqatigiissitat allattoqarnerat ukunannga inuttaqartinneqarpoq: Siunnersortaaneq Lars Olsen, KANUKOKA, allaffimmi pisortaq Leif Scharling, Nunap Iluani pissutsinut allaffeqarfik, kiisalu siunnersortaaneq Claus Stensgaard Jensen, KANUKOKA, nalilersuinermik nalunaarusiornermillu akisussaaffeqarsimasoq.