Meeqqanik pinerliisimannginnermut uppernarsaat

Inatsisartut upernaaq aalajangerput inunnik meeqqanik 15-it inorlugit ukiulinnik toqqaannartumik attaveqartussanik atorfinitsitsinermi sulisitsinermiluunniit meeqqanik pinerliisimannginnermut uppernarsaatinik pissarsisoqartassasoq. Tamanna sulinermut akissarsiaqartitsisoqarnera allatulluunniit akiliisoqarnera apeqqutaatinnagu atuuppoq. Tamanna pillugu Inatsisartut inatsisaanni nr. 8-mi, 19. maj 2010-meersumi allassimavoq.

Meeqqanik pinerliisimannginnermut uppernarsaatinik pissarsisuusussat

Taamaattumik oqartussaasut, suliffeqarfik il.il. atorfinitsitsisuusut suliffeqartitsisuusulluunniit meeqqanik pinerliisimannginnermut uppernarsaatinik pissarsisuusussaapput. Oqartussaasut, suliffeqarfik il.il. atorfinitsitsisuusoq suliffeqartitsisuusorluunniit aallarniutigalugu naliliissapput sulineq meeqqanut toqqaannartumik attaveqarfiussanersoq. Rigspolitiit meeqqanik pinerliisimannginnermut uppernarsaammi paasissutissanik suliassaqarfimmut atorfeqartitsisuusumut nassiussissaaq. Rigspolitiit paasissutissanik kissaatigineqartunik nassiussisinnaanngillat inuk paasissutissanut tunngatinneqartoq meeqqanut toqqaannartumik attaveqartussaanngippat. Tassa imaappoq inuk atorfimmi suliffimmiluunniit pineqartup suliassami suliarinerani meeqqanut15-it inorlugit ukiulinnut toqqaannartumik attaveqarfissaanut atorfinitsinneqassaaq.

Taamaattorli aamma meeqqanik pinerliisimannginnermut uppernarsaammik pissarsisoqassaaq, inuk piffissami qaammatit pingasut ingerlanerini pingasoriarluni piffissamiluunniit ataannartumi sivikinnerpaamik sap.ak. ataatsimik sivisussusilimmi meeqqanik 15-it inorlugit ukiulinnik sullitaqarsimasoq paasinarsippat, naak inuup meeqqanut 15-it inorlugit ukiulinnut toqqaannartumik attaveqarnissaa isumaanngikkaluartoq.

Meeqqanik pinerliisimannginnermut uppernarsaatit paasissutissartai

Tamatumunnga peqatigitillugu tamatuma kinguneraa inuk ass. Meeqqanut tunngasunik suliaqarnermi ataasiarluni marloriarluniluunniit pulaartutut suliaqarpat meeqqanik pinerliisimannginnermut uppernarsaatinik pissarsiniartoqassanngilaq.

Meeqqanik pinerliisimannginnermut uppernarsaat pinerluttulerinermi pineqaatissiisarnermiluunniit inatsisini ataatsimik arlalinnilluunniit unioqqutitsinerit pillugit paasissutissartaqarpoq:

Qanigivallaakkanik atoqateqarnerit, meeqqanik 15-it inorlugit ukiulinnik atoqateqarsimaneq allatulluunniit peqateqarsimaneq, meeqqanulluunniit tunngasunik pornografinik pigisaqarneq,

Meeqqanut 15-it inorlugit ukiulinnut kannguttaatsuliorsimaneq

Tamatuma kingorna meeqqanik pinerliisimannginnermut uppernarsaammi allassimassaaq inuk atorfimmik suliffimmilluunniit meeqqanut tunngassuteqartumik qinnuteqartoq siusinnerusukkut qulaani taaneqartut arlaannik pinerluuteqarsimanermut eqqartuunneqarsimanersoq.

Kikkut meeqqanik pinerliisimannginnersut uppernarsaatinik pissarsiffigineqassappat?

Meeqqanik pinerliisimannginnermut uppernarsaatinik piumasaqaateqartussaatitaaneq pillugu inatsimmi allassimavoq ass. instruktørit, ilinniartitsisut, siunnersortit, perorsaasut, sungiusaasut, spejderini siuttut, palasit il.il. kiisalu inuit allat atorfimminnut atatillugu meeqqanut 15-it inorlugit ukiulinnut toqqaannartumik attaveqartussat erseqqinnerusumik taakkartorneqartut meeqqanik pinerliisimannginnermut uppernarsaammik pissarsiffigineqassasut. Taamaattorli atorfiup suunera aalajangiisuussanngilaq inuilli suliavii apeqqutaassallutik. Tamatumunnga atatillugu inatsit aamma paarlatsinut, taartaasunut ilinniartunulluunniit praktikertunut meeqqanut 15-it inorlugit ukiulinnut toqqaannartumik attaveqartussanut atuuppoq. Atorfiit sorliit meeqqanik pinerliisimannginnermut uppernarsaatinik pissarsiffiunissaat pillugu paasissutissat sukumiinerusut pillugit Inatsisartut inatsisaat innersuussutigineqarpoq.

Nunani allani innuttaasut

Nunani allani innuttaasunik atorfinitsitsinermi piumasaqaataassaaq atorfinitsinneqartup nunami aggerfimminit nammineq pigisamik pillagaasimannginnermut allagartaqarnissaa. Rigspolitiit nunat allat pinerluttunut allattorsimaffiinit paasissutissanik pissarsisinnaatitaanngillat, taamaattumik atorfininniarlutik qinnuteqaateqartut namminneq pinerlussimannginnermut imaluunniit meeqqanik pinerliisimannginnermut uppernarsaatinik pissarsisussaapput, nuna aggerfitsik meeqqanik pinerliisimannginnermut uppernarsaatit atorpatigit.

Taamaattorli Danmarkimi Rigspolitiit pinngitsoorani meeqqanik pinerliisimannginnermut uppernarsaatinik piniarfigineqartassapput meeqqanut 15-it inorlugit ukiulinnut toqqaannartumik attaveqartussatut atorfinittussanut tamanut, sumiuuneq, najugaq allalluunniit apeqqutaatinnagit, tassami atorfinitsinneqartoq Danmarkimi, Kalaallit Nunaanni Savalimmiuniluunniit eqqartuunneqarsimasinnaammat, naak nunani taakkunani najugaqanngikkaluarlutik imaluunniit innuttaasuunngikkaluarlutik. Taamaattumik nunani allamiunik atorfinitsitsinermi suli pingaaruteqarluinnarpoq atorfinitsinneqartup atii tamaasa aammalu inuuiata atorfinitsitsinermi immersugassami allassimanissaat.

1. august 2010 aallarnerfigalugu atuutilerpoq

Meeqqanik pinerliisimannginnermut uppernarsaatinik pissarsinissamik piumasaqaat taamaallaat inunnut 1. august 2010-mit siumut atorfinitsinneqartussanut atuuppoq. Tassa imaappoq meeqqanik pinerliisimannginnermut uppernarsaatinik pissarsisussaatitaaneq taamaallaat nutaanik atorfinitsitsinernut atuuppoq. Taamaattorli oqartussaasut, suliffeqarfik il.il. atorfinitsitsisuusoq sulisitsisuusorluunniit tamatumunnga pisussaaffeqanngikkaluarlutik namminneq aalajangersinnaapput inuit inatsisip atuutilinnginnerani atorfinitsinneqartut meeqqanik pinerliisimannginnermut uppernarsaatinik pissarsiffigineqassanersut.

Najoqqutassanik pissarsiniarneq

Meeqqanik pinerliisimannginnermut uppernarsaatinik pissarsineq akeqanngilaq paasissutissat qulaani aaneqarsinnaavoq uani ”Meeqqanik pinerliisimannginnermut uppernarsaat – Kalaallit Nunaanni”. Tassaniippoq aamma rekvisitionip immersornissaanut ilitsersuut kalaallisut danskisullu. Suliassaqarfiup atorfinitsitsisuusup paasissutissat downloadersinnaavai immersugassarlu immersorlugu, kiisalu inummit paasissutissanut tunngatinneqartumit erseqqissumik akuersisoqarluni atsiortoqarnissaa qularnaarlugu. Tamatumunnga atatillugu malugiuk rekvisition printerneqarsinnaammat immersorneqarlunilu, tamatumalu kingorna nalinginnaasumik allakkatigut Rigspolitiinut nassiunneqarsinnaammat faxerneqarluniluunniit. Rigspolitiilli meeqqanik pinerliisimannginnermut uppernarsaatinik oqartussanut, suliffeqarfinnut il.il. atorfinitsitsisuusunut sulisitsisuusunulluunniit nalinginnaasumik allakkatigut tamatigut nassiussisarput.

Nipangiussisinnaatitaaneq

Tamatumunnga atatillugu inatsimmi allassimavoq meeqqanik pinerliisimannginnermut uppernarsaatit imarisai allanut tusarliussassaanngitsutut pineqassasut, taamatullu aamma meeqqanik pinerliisimannginnermut uppernarsaatit imarisaanut tunngasunik nipangiusimannittussaatitaaneq pillugu malittarisassanik unioqqutitsineq pinerluttulerinermi inatsimmi malittarisassat malillugit kinguneqartinneqassalluni. Nipangiusimannittussaatitaanerup kinguneraa inuup meeqqanik kinguaassiuutitigut atornerluisimanermut eqqartuunneqarsimanera pissutigalugu inuk taanna atorfinitsinneqartussaajunnaarpat allanit paasineqassanngitsoq sungiusaasoq, ilinniartitsisoq, perorsaasoq, siunnersorti il.il. atorfinitsinneqanngitsoq. Pisariaqarsorineqarpat taarsiullugu nassuiaatigineqarsinnaavoq pineqartoq atorfimmik suliffimmilluunniit isumaginninnissamut naammattunik piginnaasaqarsimanngitsoq.