Asimi nunamut pilersaarusiornermi nuna tamakkerlugu malitassat

Pilersaarusiornermi nuna tamakkerlugu malitassat uani takuneqarsinnaapput

UKA2008-mi asimi nunamik ingerlatsineq Naalakkersuisuniit kommuninut tunniunneqassasoq Inatsisartuni akuerineqarpoq. Tamatumunnga atatillugu Ineqarnermut, Attaveqarnermut Angallannermullu Naalakkersuisoqarfimmi Nuna tamakkerlugu pilersaarusiornermut immikkoortortaqarfiup asimi nunamut pilersaarusiornermi nuna tamakkerlugu malitassatut siunnersuut suliaraa. Nuna tamakkerlugu malitassani asimi nunami, tassalu illoqarfiit nunaqarfiillu avataaniittuni nuna tamakkerlugu malitassat aalajangersarneqarput.

Oqartussaasutut akisussaaffik 1. januar 2011-mi kommuninut tunniunneqarpat asimi nunamut aalajangersakkanik peqarnissaq Pilersaarusiornermi nuna tamakkerlugu malitassani qulakkeerneqartussaavoq. Aalajangersakkat taakkua kommunit kommunimut pilersaarusiornermi aamma nunami asimiittumi nunaminertanik aqutsinermi tunngavissatut atortussaavaat.

Tunuliaqutaasoq

UKA2010-mi pilersaarusiorneq aamma nunaminertat atorneqartarnerat pillugit inatsimmut allannguutit kingulliit atuutilernerisigut, asimi nuna illoqarfiit nunaqarfiillu nunap aggornerinut agguaasarnerup assinganik nunap aggornerinut agguarneqassaaq. Asimi nuna nunap aggornerinut imatut aggorneqassaaq:

• K. Sumiiffiit aggorneri sunngiffimmi aasarsiortarfittullu il.il. atorneqartunik illuarallit
• L. Sumiiffiit aggorneri immikkut sukisaarsaarfittut atorneqartut
• M. Sumiiffiit aggorneri savaateqarfittut, nunaleriffittut, imaanik atuiffittut, orpinnik naatitsivittut, qeqertatut qimmilivittut il.il. atorneqartut.
• N. Sumiiffiit aggorneri teknikkimut attaveqarnermullu il.il. atorneqartut.
• O. Sumiiffiit aggorneri sanaartorfigineqanngitsut.

        Sumiiffiit O-t imatut agguarneqassapput:

• O-I. Sumiiffiit annertuumik ivigartorfissatut immikkoortinneqartut.
• O-II. Sumiiffiit immikkoortitigaanngitsut
• O-III. Inuilaarsuaq

Sumiiffinni nunap aggornerisa immikkoortui taakku asimi nunamut suliat tunngavigalugit suliarineqarput, tassanilu eqqarsaqqissaartitanik pilersitsisoqarpoq. Eqqarsaqqissaartitat 2007-imi aamma 2008-mi marloriarlutik isumasioqatigiipput. Pilersaarusiornermi nuna tamakkerlugu malitassat atulernerisigut, asimi nuna tamakkerlugu sumiiffinnut aggorneqassaaq.

Sumiiffiit aggornerini ataasiakkaani nunap killeqarfissaattut inissiiffissatullu siunnersuutigineqartut aamma NunaGIS-ikkut takuneqarsinnaapput (www.nunagis.gl).

Pilersaarusiornermi nuna tamakkerlugu malitassat asimi nunami pilersaarusiortarnermi nunaminertanillu atuinermi oqartussaasutut akisussaaffiup 1. januar 2011-mi Naalakkersuisuniit kommuninut tunniunneqarneranut peqatigitillugu atuutilissapput.

Inatsisit sunniutissaat

Pilersaarusiornermi nuna tamakkerlugu malitassat tamanut nalunaarutigineqarneranni, nunaminertat, illuutit sanaartukkallu, malitassani pineqartunut ilaasut, malitassanut naapertuuttumik taamaallaat atorneqarsinnaapput imaluunniit sanaartorfigineqarsinnaallutik. Kommunini ataasiakkaani kommunalbestyrelsi pilersaarusiornermi nuna tamakkerlugu malitassat piviusunngortinneqarnerannik isumaginnissaapput, ilanngullugit nunaminertanik atugassiinerni.

Naammagittaalliornissamut ilitsersuut

Pilersaarusiornermi nuna tamakkerlugu malitassat tamanut saqqummiunneqartut ingerlatsinermi oqartussaasunut arlaannaannulluunniit naammagittaalliuutigineqarsinnaanngillaq. Pilersaarusiornermi nuna tamakkerlugu malitassat eqqartuussivinnut suliakkiissutigineqarsinnaapput.