Namminersortoorusuppit?

Soqutiginnikkuit nittartagaq www.inussuk.gl alakkarteruk.

Inunnut imaluunniit selskab-inut Kalaallit Nunaanni inuussutissarsiornermik ingerlatalinnut ingerlataqarniartunuluunniit ilitsersuut

Inatsisartut inatsissaat nr. 12, 12. november 2001-imeersoq, kingusinnerusukkut allannguutitigut Kalaallit Nunaanni inuussutissarsiummik ingerlataqarnermik aaqqiissuteqartitsivoq. Ilitsersuut manna sulianerineqarpoq inuit imaluunniit suliffeqarfiit, Kalaallit Nunaanni inuussutissarsiummik ingerlataqartut, ikiorserumallugit inatsisip aalajangersartagaanik pingaarutilinnik paasinninnissaannut.

Inatsisip § 1-ani atuarneqarsinnaavoq, inatsit atuuttoq inuussutissarsiummut imaluunniit suliassaq pillugu neqeroorut erseqqissumik aalajangernagu sivisussuseqartumut Kalaallit Nunaanni ingerlanneqartumut imaluunniit suliarineqartumut.

Inuutissarsiornikkut suliffeqarfiit taamaallaat pineqarput suliffeqarfiit allat pisariaqartitaannik naammassinnikkumallutik tuniniaasartut sullissisartut il.il.  aammalu aningaasatigut iluanaaruteqarnissamik siunertaqartut. Suliaq paasineqassaaq suliat suulluunniit tamarmik namminersortunik imaluunniit sulisitsisunit inniminniinikkut imaluunniit regningiliornikkut suliarineqartut.

Aammattaaq inatsimmut attuumassuteqartoqarsinnaavoq taamaallaat, inuussutissarsiummik ”piffissami killilimmi” ingerlatsigaanni. ”Piffissaq killilik” Naalakkersuisoqarfiup paasinninnera malillugu naammassineqarsimassaaq qaammatit aqqaneq marluk ingerlaneranni ulluni 90-ini inuussutissarsiut ingerlanneqarsimappat. Tamanna ima isumaqarpoq suliffeqarfik kalaallinik piginneqanngitsoq immikkut akuerineqaqqaartigani sulisuminik Kalaallit Nunaaniititsisinnaanngimmat qaammatit aqqaneq marluk ingerlaneranni ullut 90-it sinnerlugit. Aamma tamanna atuuppoq suliffeqarfik taanna sulisuminik inissiigallartarsimappat, inuit ataasiakkaat ullut 90-it ingerlanerata iluani taarserneqartarlutik. Suliffeqarfimmi ataatsimi sulisut qaammatit aqqaneq marluk ingerlaneranni Kalalallit Nunaaniitsinneqartarneranni piffissaq atorneqartoq katinneqartassaaq.

Kiisalu suliffeqarfiit inatsisip aalajangersagartaani pineqartut taamaallaat taakkuupput, inuutissar-siornikkut suliffeqarfik imaluunniit tassani suliassai Kalaallit Nunaanni ingerlanneqartut.

Inuutissarsiornikkut suliffeqarfik aamma suliai suuppat?
Inuutissarsiornikkut suliffeqarfiusinnaasut kinguliini nalunaarsorneqarput:
• Niuertut
• Assassornermik suliallit
• Suliffissuarnik ingerlatsisut
• Siunnersortit
• Akunnittarfiit
• Imerniartarfiit
• Nassiussalerisut (nammineq ateq atorlugu imaluunniit allanut regninngiliornikkut nassiussanik nassiussinerit)
• Qamutaatillit (inunnik angalassinerit imaluunniit qamutit motoorillit atorlugit pigisanik angallassinerit)
• Akitsorterisartut
• Pappiaqqanik aningaasanik nalilinnik niuertut
• Inissianik tuniniaasartut
• Inissiaatillit peqatigiiffii, taakkua suliffiutaat inuutissarsiutigalugu niuerfittut avammut saqqummertarpata
• Peqatigiiffiit aningaasaliisartut

Inuutissarsiornikkut suliffeqarfiit suut inuutissarsiornermut inatsimmi aalajanger-sakkanut ilanngunneqanngillat?
• Kalaalimineerniarfimmi tuniniaaneq
• Aalisarneq
• Piniarneq
• Aallaaniarneq
• Nunalerineq
• Eqqumiitsulianik kusanartuliorneq assigisaallu

Suna inuutissarsiornikkut suliffeqarfiunngila?
• Nammineq suliffeqarfiummi atugassanik tunisassiorneq. Assersuutigalugu:
o Aatsitassarsiorneq
o Uuliarsiorneq
o Sikumik imermillu avammut tunisassiassanik misissueqqaarnerit

Kikkut Kalaallit Nunaanni inuutissarsiornikkut suliffeqarfimmik ingerlatsisinnaappat?
Inatsisip §§-ni 2-7 atuarneqarsinnaavoq, kikkut Kalaallit Nunaanni inuutissarsiornermik ingerlatsisinnaanersut aamma suut piumasaqaatigineqartut.

Inuit inuutissarsiummik ingerlatsisinnaapput taakkua: 
• Kalaallit Nunaanni najugaqarunik
• Inersimasutut piginnaatitaagunik
• Kalaallit Nunaanni  Erhvervsregister-imut nalunaarsimagunik
• Aammalu akiliisinnaajunaartutut suliarineqanngikkunik

Aktie- aamma anparts- aamma andelsselskab’it piginnaatitaapput inuutissarsiummik ingerlatsisinnaanermut taakkua: 
• Kalaallit Nunaanni Erhvervsregister-imi nalunaarsorneqarsimagunik
• Piviusumik siulersuisut Kalaallit Nunaanni inissisimappata
• Direktionen-imi siulersuisunilu ilaasortat inersimasutut piginnaatitaappata 
• Direktion-imi siulersuisunilu ilaasortat akiliisinnaajunaartutut suliarineqanngippata

Inatsisip aalajangersagaaniik kikkut immikkut akuerineqarsinnaappat?

Pissutsini immikkut illuinnartuni Naalakkersuisut inunnut imaluunniit suliffeqarfinnut, inuussutissarsiummik ingerlatsinissamut inatsimmi tak. inuussutissarsiornermut inatsimmi § 3 aamma § 5-imi imm. 5, immikkut piumasaqaataasunik naammassinnissimanngitsunut, akuersissuteqarsinnaapput.

Malugiuk.
Ilitsersuumi matumani taamaallaat pineqarput inuussutissarsiummik ingerlataqarneq pillugu inatsisip aalajangersagartai. Inuk imaluunniit selskab’i akileraartussaatitaanersoq, qangamiit qanorlu annertutigisumik, aalajangerneqassaaq Akileraartarneq pillugu inatsisip aalajangersartagaasigut. Tamanna pillugu saaffiginnittoqarsinnaavoq akileraartarnermut pisortanut. 

Kina attaveqarfigineqarsinnaava?
Ilitsersuut manna atuareerlugu Inuussutissarsiorneq pillugu inatsimmut tunngatillugu suli apeqqutissaqartoqaruni Inuussutissarsiornermut Suliffeqarnermullu Naalakkersuisoqarfik attavigineqarsinnaavoq sumiiffik kinguliiniittoq atorlugu. Aamma maanga immikkut akuerineqarnissamik qinnuteqartoqassaguni taanna nassiunneqarsinnaavoq.

Postboks 1601 
3900 Nuuk
isiin@gh.gl