Inuussutissarsiornermut tunngasutigut Naalakkersuisunut siunnersuisarneq nutarterniarlugu Inuussutissarsiutinik ineriartortitsineq pillugu siunnersuisoqatigiit 2007-ip aallartinnerani pilersinneqarput aammalu Inuussutissarsiutinik ineriartortitsineq pillugu siunnersuisoqatigiit 2007-mi aprilimi isumasioqatigiissimapput taaguuteqartumi: "Inuussutissarsiutitigut aaqqissuussanermut nutaamut ingerlaneq - inuussutissarsiutinik ineriartortitsinermi sulisoqarnermilu aaqqissuussaanikkut unammilligassat 2007-2014". Isumasioqatigiinnermi peqataasunit arlalinniit inuussutissarsiornermi immikkoortut aaqqissuussaanikkut unammilligassaat pingaarnerit kiisalu immikkoortuni ataasiakkaani ajornartorsiutinik aaqqiissutissatut kaammattuutit siumut sammisut saqqummiunneqarput. Tamatuma kingorna Inuussutissarsiutinik ineriartortitsineq pillugu siunnersuisoqatigiit unammilligassat kaammattuutillu taakku suliarisimavaat, siunnersuisoqatigiillu Naalakkersuisunut suliaq ataatsimut katiterlugu saqqummiussimavaat
Siunissami suna inuussutigissaneripput - aamma tamatuma pitsaanerpaamik qanoq anguneqarsinnaanera pillugu apeqqut aallaavigalugu pingaarnertigut Inuussutissarsiutinik ineriartortitsineq pillugu siunnersuisoqatigiit sulivoq. Apeqqut pingaartuuvoq, piffissami aalisarnikkut isertitaqarneq sumiiffinni nunanilu tamalaani annertuumik tatisimaneqarnerani, pisortaniit tapiissuteqarfiusartoq, aamma imaani nunamilu naleqqutinngitsumik inuppassuarnik sulisoqartoq. Ilutigisaanik inuussutissarsiutini annertuumik siuariartorfiusuni periarfissat nutaat saqqummerarput, sulisussalli amigaatigineqarlutik.
Saqqummiussami inerniliisoqarpoq aalisarnermik inuussutissarsiummiit sunniutikitsumiit, akisuumiit naleqqutinngitsumillu aaqqissuussaasumiit suliffiit aalajangiussimaneqartut aatsitassarsiornerup, sanaartornerup, takornariaqarnerup, aluminiumileriffiup aamma nunami inuussutissarsiutit allat iluanni, tassunga ilanngullugit sullissiviit, assartuiffiit aningaaseriviillu, inuussutissarsiutini siuariartortuni suliffinnut akissaatigissaartunut aalajaatsunullu nuunneqarnissaannut ullumikkut asseqanngitsumik periarfissaqartugut. Ilutigisaanik aalisarnermi tunisassiornerup naammassiuminarsarnissaanut aamma periarfissaqarpoq inuussutissarsiutip ilaa imminut akilersinnaasoq aallullugu nunamilu inuussutissarsiutini tunisassiorneq nukittorsarlugu, siunissami inuussutissarsiutitigut siuariartorfiusutigut nukittorsaalluta aningaasarsiornermullu ilassuteqarluta.
Aamma inerniliisoqarpoq ataatsimut sammisumik amerliartorfeqarnissaq pingaaruteqartoq, assersuutigalugulu inuussutissarsiutit nutaat ineriartorfiusut inuussutissarsiutinit allanit sulisunik suli pisariaqartitsisunik sulisunik naammassisaqarsinnaasunik tillingaannaratik, imaluunniit inuussutissarsiutitigut aaqqissuussaaneq nutaaq ataatsimut sammisoq pilersillutigu. Taamaalilluta sulisinnaasut pitsaanerulersinnissaat pikkorissarnissaallu aallunniartariaqarparput taamaalillutalu Ilinniartitaanermut pilersaarummi sulineq suli pingaarnerutillutigu kiisalu immikkoortuni tamani tunisassiornerup qaffasissup imminullu akilersinnaasup allanngortinnginnisssaanut pisariaqartitsisoqartillugu taakku nunanit allaniit tikisitsinikkut ilassuteqarfigalugit.
Inuussutissarsiutinik ineriartortitsineq pillugu siunnersuisoqatigiit unammisassanut qulaani taaneqartunut akissutaat tassaavoq siunissaq ungasinnerusoq eqqarsaatigalugu pilersaarusiorneq aamma tunisassiornerup naammassisaqarfiusinnaanera annertuumik aallunneqarnissaanut aamma inuussutissarsiutinit qangaanerusuniit suliffiit sulisinnaasut pioreersut pitsaaninngortinnerisigut, piginnaanngorsaqqinnerisigut aamma sulisoqarnikkut ineriartortitsinikkut allanngortinnerisigut inuussutissarsiutit ineriartorfiusut aallunneqarnissaannut piumassuseqarneq. Sulisoqarnikkut ineriartortitsisoqanngippat inuussutissarsiutitigut ineriartortitsinermi periarfissarpassuagut iluaqutaasullu arlallit annaassavagut.