Sanaartorfissanik pilersaarusiorneq

Sanaartorfissanik pilersaarusiorneq imaaliorlutit ilisimasaqarfigilissavat

Sanaartorfissaanik pilersaarusiorneq qanoq atussagatsigu?
Sanaartorfissanik pilersaarusiornikkut siunertarineqarpoq nunatsinni nunaminertat atugassanngortinneqartarnerisa inuiaqatigiinnut tunngassuteqartut ataatsimut naliliiffigineqartarnerisa qulakkeerneqartarnissaat. Tamatumani ilaatigut pissutaavoq, illoqarfitta nunaqarfittalu ilusaasa sanaartornerup  kingorna tamatigut allanngortinneqarsinnaajunnaartarnerat.

Pilersaarusiornikkut siunertarineqartut naammassineqarnissaannut atatillugu sianiginiagassat pingaarnerit tassaapput, nunaminertanik atugassanngortitsinermik pilersaarusiornermi inuiaqatigiit akuutinneqartarnissaat. Tamatuma kinguneraa, illit pilersaarusiornermut sunniuteqaqataasarnissat.

Pilersaarutit suuppat?
Illit kommunerisanni sanaartugassanik pilersaarusiortarnermi tunngaviusartut assigiinngitsorpassuarnik pilersaarutitaqartarput. Kommunalbestyrelse katillugit  pilersaarusioriaatsinik assigiinngitsunik sisamanik suliaqarsinnaavoq:

• Kommunimut pilersaarut
• Kommunimut pilersaarummut ilassut
• Illoqarfiup ilaanut pilersaarutit
• Asimut pilersaarutit.

Pilersaarummut siunnersuut qanoq atuassaviuk?
Pilersaarummut siunnersuutit tamarmik nassuiaatitaqarput paasissutissartalinnik aalajangersagartalinnillu, pilersaarut akuersissutigineqareerpat akuersaarneqareerpalluunniit tamanullu nalunaarutigineqareerpat pilersaarummut siunnersuutip ilaanik inatsiseqartitsinikkut atuuffittalimmik (inatsiseqartitsinikkut atugassaqartitsissutitalik).

Nassuiaatitaani nassuiarneqarpoq pilersaarusioriaaseq sorleq pineqarnersoq, sooq pilersaarummut siunnersuutip suliarineqarsimanera, pilersaarutinut allanut siunnersuutip attuumassuteqarnera, piffissamilu sorlermi pilersaarummut siunnersuutip tamanut takusassiarineqarsimanera. Nassuiaatip pilersaarummi aalajangersakkat ilanngunneqarsimasut ilinnut paasiuminarnerulersissavai.

Kommunimut pilersaarut tamatigut annertuujusarpoq immikkoortillugulu naqitanngortinneqartarluni mappersaganngortinneqartarluniluunniit. Taanna tamatigut pilersaarummut nassuaataasarpoq innuttaasut pillugit pissutsinik immikkoortortaqartarluni kiisalu immikkoortunut pilersaarutinik tamarmik immikkut killiffimmik, ineriartornermut pissutsinik, anguniakkanik, iliuusissatut pilersaarummik aammalu suliassaqarfimmut immikkoortunut aningaasaliinissamut pilersaarummik.

Pilersaarummut siunnersuutit pilersaarutillu atuuttut sumi nassaarisinnaavigit?
Pilersaarummut siunnersuutit pilersaarutillu atuuttut kommunip allaffiani pissarsiarisinnaavatit. Kommune taassuma saqqummersinneqarnerata akianut naapertuut-tumik akiliuteqartitsinissamut pisinnaatitaavoq. Tamatuma kinguneraa, kommuni-mut pilersaarummik pissarsinissamut illit akiliuteqartarnissat.

Siunissami nalinginnaanerulersussaavoq, kommunit sanaartugassanik pilersaarumminnik nittartakkaminnut immiussisalernissaat. Tamatumunnga assersuutitut kinguliiniittuni taamaattumik pissarsisinnaavutit.  

Pilersaarusioriaatsini sisamaasuni assigiinngissutit imaapput

Kommunimut pilersaarut sunaava?
Kommunimut pilersaarut tassaavoq kommunip illoqarfittaanut nunaqarfiinullu kiisalu asimi kommunip soqutigisaqaqarfiini pilersaarut annertooq. Pilersaarusioriaatsini taakkunani sisamani kommunimut pilersaarut annertunerpaajuvoq, taannalu piler-saarutinik arlalinnik imaqartinneqarpoq:

• Illoqarfiup nunaqarfiullu killigititaanut pilersaarutikkut asimut tunngatillugu illoqarfik nunaqarfiillu killeqarfiligaapput, illoqarfiummi avataanut nunaqarfinnilu tamani nunaqarfiit avataannut killigititanik aalajangersaasoqartarmat. Taamatuttaaq asimi kommunip soqutigisaqarfiinik toqqaasoqartarpoq.  
• Illoqarfimmut pilersaarutkkutp inissiat, suliffeqarfiit, kiffartuussiviit, angallannermi atortulersuutit teknikikkullu atortulersuutit sumiiffissaannut periaasissatut pingaarnerusunik aalajangersaavigineqartarput. Killiliussaqarfinnik immikkoortite-risoqartarpoq, killiussaqarfinnilu ataasiakkaani tamani kingorna illoqarfiup  ilaanut pilersaarusiornissamut malittarisassanik aalajangersaasoqartarpoq.  
• Nunaqarfimmut pilersaarut nunaqarfimmut ataasiakkaamut periaasissatut pingaarnerusunik aalajangersaaviusarportaaq, tamatumanili sukumiinnginnerusumik. Pisariaqarpat nunaqarfimmi sumiiffinnik immikkoortiterisoqarsinnaavoq, nunaminertamullu atugassanngortitamut aalajangersimasumut malittarisassanik aalajangersaasoqarsinnaalluni.
• Nunaminertanik atugassanngortitsinermut malittarisassat illit kommunerisanni qinnuteqaatit qanoq suliarineqartarnerat aalajangersaavigisarpai. Taamaalilluni inatsisit killissarititaanni kommunit akornanni allanngoraatinik aalajangersaaso-qarsinnaasarpoq, tassunga ilaallutik assersuutigalugu nunaminertamut ataatsimut qinnuteqaatinik arlalinnik suliaqarneq imaluunniit sumiiffinnut ataasiakkaanut immikkut aalajangersaasarneq.

Kommunimut pilersaarutit 90-ikkunni suliarineqarput, pisariaqarpallu pilersaarutit iluarsartuunneqarnissaasa tungaannut ukiut 10-15-it atuuttussaallutik. Ukiuni makkunani kommunit ilaat kommunimut pilersaarumminnik iluarsartuussileruttorput, ilaasalu 2009-mi kommunit nutaamik iluarsartuunneqarnissaannut utaqqisitsillutik. Kommunimut pilersaarummut siunnersuut sapaatit akunnerini 12-ini tamanut takusassiarineqartussaavoq. Siunnersuut Naalakkersuisunit akuersissutigineqartussaavoq.

Kommunimut pilersaarummut tapiliussaq sunaava?
Kommunimut pilersaarummut tapiliussaq saqqummiunneqartarpoq, sanaartugassatut pilersaarut aalajangersimasoq imaluunniit sanaartorfissaq nutaaq eqqarsaatigalugit kommunimut pilersaarutip iluarsartuunneqarnissaa pisariaqaleraangat. Ilassut tamatigut taamaallaat illoqarfiup nunaqarfiulluunniit ilaannannguanut atuuttarpoq. Kommunimut pilersaarummut ilassut sapaatit akunnerini 12-ini, taamaattorli illoqarfimmi illoqarfiup ilaanut pilersaarutip siunnersuutaanut ilaatillugu suliarineqarsimagaangat sapaatit akunnerini arfinilinni, tamanut takusassiarineqartussaavoq.

Illoqarfiup ilaanut pilersaarut sunaava?
Illoqarfiup ilaanut pilersaarutip illoqarfimmi sumiiffinni annertuujunngitsuni illut sanaartukkallu inissinneqarnissaat ilusilerneqarnissaallu sukumiisumik aalajangersaavigisarpai. Illunik sanaartukkanillu annertuunik pingaarutilinnilluunniit sanaartu-linnginnermi kommunalbestyrelsip pisussaaffigaa illoqarfiup ilaanut pilersaarummik saqqummiussaqarnissaq. Illoqarfiup ilaanut pilersaarummut siunnersuut sapaatit akunnerini arfinilinni tamanut takusassiarineqartassaaq. Kommunalbestyrelsip pilersaarut nammineerluni akuersissutigisassaraa.

Asimut pilersaarut sunaava?
Asimut pilersaarutip asimi sumiiffimmi ataatsimi arlalinniluunniit illut sanaartukkallu inissisimaffissaat ilusissaallu aalajangersaavigisarpai. Kommunalbestyrelse asimut pilersaarummik saqqummiussaqarnissaminut pisussaatitaanngilaq, sumiiffimmili aalajangersimasumi nunaminertamut assigiinngitsunik soqutigisaqartoqaraangat tamanna isumassarsiatsialaavoq. Asimut pilersaarummut siunnersuut sapaatit akunnerini arfinilinni tamanut takusassiarineqartassaaq. Siunnersuut Naalakkersui-sunit akuersissutigineqartussaavoq.

Imaaliorlutit pilersaarusiornermut sunniuteqaqataas-saatit

Sooq tusarniaavigineqassavit?
Nunaminertat atorneqartarnerat pillugu inatsiseqartitsinermi atuarneqarsinnaavoq, nunaminertat atugassanngortinneqartarnerannut pilersaarusiortarnermi innuttaasut akuutinneqartarnissaat. Tamatumani ilaatigut pissutaavoq, illoqarfiit nunaqarfiillu sanaartorfigineqartarnerat taakkunani najugaqartunut tunngasuusarmat, kiisalu illoqarfiit nunaqarfiillu ilusilereerneranni allanngortikkuminaattarnerat.

Qaqugukkut tusarniaavigineqartassavit?
Taamaattumik siunnersuuteqarnerup nalaani illit isummat aalajangiisuusinnaavoq, taamaattumillu pilersaarummut siunnersuutit tamarmik Naalakkersuisunit aalajangiivigineqalivinnginneranni akuersissutigineqalivinnginnerannilu piffissami aalajangersimasumi tamanut takusassiarineqartussaapput. Tamanut takusassiarinninnerit najukkanni aviisimi, kommunip allaffiata allagarsiiviani imaluunniit kommunip innuttaasunut saaffiginnittarfiini nalinginnaasuni saqqummiunneqartarput. Tamanut takusassiarinninnerup nalaani pilersaarummut siunnersuutip imarisaanut oqaaseqaativit assuarliutivilluunniit saqqummiunneqarnissaannut periarfissaqassaatit.

Qanoq tusarniaavigineqassavit?
Sanaartugassanik pilersaarusiorneq pillugu tamat oqallisiginninnissaat kommunivit pisussaaffigaa. Kommunimut pilersaarummut siunnersuummut atatillugu taanna tamatigut aviisitut oqallisissiatut illunut tamanut agguaanneqartarpoq, radiumi tv-milu paasisitsiniaassutigineqartarluni oqallissutigineqartarlunilu kiisalu innuttaasut ataasiarlutik arlaleriarlutilluunniit ataatsimiissutigisarpaat, tamatumani illit oqaaseqaateqarnissannut periarfissaqarfigisinnaasannik.
 
Qanoq assuarliuteqassavit?
Innuttaasut ataatsimiitinneqarneranni nalinginaasumik ilimagisinnaavat, illit oqaaseqaatitit kommunip aqutsisoqarfianit allanneqartarnissaat. Kommunip oqaaseqaativit assuarliutivillu suliarineqarnissaat qulakkeerniarukku, taakkua allakkatigut tun-niutissavatit. Tamanna pisassaaq pilersaarummut siunnersuutip nassuiaatitaani najukkamut allassimasumut, tamannalu tamanut tusarniaassutiginninnerup naannginnerani pisassaaq.

Assuarliutigisat qanoq suliarineqassava?
Pilersaarutinut siunnersuutit tamarmik kommunalbestyrelsimit oqaluuserineqassapput, aamma tamanut takusassiarineqarnerisa siorna kingornalu. Tamanut takusassiarinnereernermi oqaaseqaatit assuarliutillu tamarmik kommunalbestyrelsimut, pilersaarummut siunnersuutip qanoq allannguuteqartinneqartiginissaanik isummertussamut, saqqummiunneqassapput.

Allakkatigut assuarliuteqarsimasoq sulianik suliarinnittarneq pillugu inatsit naapertorlugu kommunalbestyrelsip assuarliummut isummernera pillugu allakkatigut nalunaarfigineqartussaatitaavoq.

Pilersaarummut siunnersuut sumi pissarsiarisinnaaviuk?
Pilersaarummut siunnersuut kommunip allaffiani pissarsiarisinnaavat. Kommune taassuma saqqummersinneqarnerata akianut naapertuuttumik akiliuteqartitsinissamut pisinnaatitaavoq. Tamatuma kinguneraa, pilersaarummut siunnersuummik pissarsinissamut illit akiliuteqartarnissat.

Siunissami nalinginnaanerulersussaavoq, kommunit sanaartugassanik pilersaarumminnik nittartakkaminnut immiussisalernissaat. Tamatumunnga assersuut kinguliiniittoq pissarsiarisinnaavat..