Piginnaanngorsaaneq

Inuussutissarsiornermut, Suliffeqarnermut, Inuussutissarsiutinullu Ilinniartitaanermut Aqutsisoqarfik inuussutissarsiutinut ilinniartitaanermut tunngasuni aningaasatigut, allaffissornermi pilersaarusiornermilu suliassat isumagisarai.

Qitiusumik ilinniarfiit atuagarsortitsineq isumagisaraat. Qitiusumik ilinniarfik forstanderimit aqunneqarpoq, atuarfinnullu atatilluguqitiusumik ilinniartitaanermut ataatsimiititaliaqarpoq, taassumalu ilinniarnerit ilikkagassatigut qaffasissumik inissisimanerisa nakkutiginissaat suliassaralugu. Ilinniarnerni taamaattuni Qitiusumik Ilinniartitaanermut Ataatsimiititaliaq suliamik ilisimasaqarfiusutut qullersaavoq.

Sumiiffinni inuussutissarsiutinut ilinniarfiit ilinniartunik siunnersuineq kiisalu sulinikkut sungiusarfinnut atassuteqartarneq isumagisaraat. Aammattaaq sumiiffinni ilinniarfiit ataasiakkaat niuernerup allaffissornerullu kiisalu sanaartornerup iluani inuussutissarsiutinut tunngaviusumik ilinniarfinni ilinniartut aallaniutaasumik ilinniartinneqarnerat isumagisaraat.

Najukkami inuussutissarsiutinut Ilinniarfik Inuussutissarsiutinut ilinniartitaanermut pisortamit aqunneqarpoq. Ilinniarfimmut atasumik Najukkami Inuussutissarsiutinut Ilinniartitaanernut Ataatsimiititaliaqarpoq, ataatsimiititaliaptaassuma ilaatigut suliassaraa ilinniartitsinerup aalajangersakkanut naapertuuttumik naammassineqarnissaa, ilinniartussat tiguneqarnerat isumagisaralugu, suliffiit sungiusarfissat pissarsiarisarlugit kiisalu ilinniagaqarniarlutik qinnuteqartut amerlassusaat sumiiffimmi inuiaqatigiinnut naleqqussartarlugit.

Inuussutissarsiutinut tunngaviusumik ilinniartitaanerit makku iluanni ilaapput sanaartornermut saviminilerinermullu tunngasut, niuerneq allaffissornerlu, inuussutissalerineq, isumaginninneq peqqinnissarlu, ilusilersuinermut tunngaviusumik ilinniarnerit, sullissinernut tunngasumik ilinniarnerit kiisalu innaallagisserinermik tunngaviusumik ilinniarnerit. Ilinniarnerit assigiinngitsunik sivisussuseqarput ilinniarnerup suunera apeqqutaalluni.