NORA

NORA tassaavoq Nordisk Ministerrådimi nunat immikkoortuini ingerlatsinikkut suleqatigiiffiup ataani killeqarfiit akimorlugit komité, naalagaaffit akornanni sulqatigiiffittut ingerlasoq. NORA Nordisk Ministerrådimit aningaasalersorneqarpoq suleqatigiissunit sisamaasunit, Savalimmiunit, Kalaallit Nunaanit, Islandimit aamma Norgemi sineriammiunit nunap akiliutaanik taperneqartarluni.

NORA-p qullersaqarfia Savalimmiuni Tórshavnimiippoq. Nunat sinnerini Islandimi, Kalaallit Nunaanni, Norgip Kujataani Kitaanilu kiisalu Norgip Avannaani allattoqarfinni inuit attaveqaataasut sisamaapput.

NORA Atlantikup avannaani nunani avannarlerni immikkoortutut nukittuunngortinniarlugu immikkoortumi suleqatigiinnerup nukittorsarnissaanut peqataassaaq, aningaasarsiornikkut ineriartorneq atasinnaasoq nukittooq ilisarnaatigalugu. Tamanna ilaatigut pissaaq nunat killeqarfii akimorlugit inuussutissarsiutigalugu suliffeqarfiit aamma ilisimatusarfiit suleqatigiiffillu ineriartortitsiviit akornanni suleqatigiinneq nukittunerulersillugu.

NORA-p taamaalilluni suliassaraa:

· politikikkut suliatigullu oqalliffimmik pilersitsinissaq, atlantikup avannaani ajornartorsiutit oqallisigineqarlutik aamma iliuusissat ataatsimullu suliniutissat ineriartortinneqarlutik

· suliniutitigut suleqatigiinnermik ingerlatitseqqilluni pilersitsillunilu

· piujuartitsinissamut nunani avannarlerni tunngaviusut naapertorlugit ineriartornermut sunniuteqassalluni

· nunat avannarliit nunanik sanilerisaminnik suleqatigiiffiattut NORA pilerinartunngornissaanut ineriartortissallugu

Savalimmiut, Kalaallit Nunaata, Islandip aamma Norgemi sineriammiut akornanni inuussutissarsiutitigut suleqatigiinnermik siuarsaasumik suliniutinut tapiissutissanik qinnuteqartoqarsinnaavoq. NORA-p pingaarnertut suliniuteqarfiisa iluanni suliniutinut tapiissuteqarnissaq pillugu qinnuteqartoqarsinnaavoq:

· Isumalluutit imarmiut – Suliniutit piujuartitsinissaq tunngavigalugu isumalluutit pigineqartut, saniatigut tunisassiat, uumassuseqartunik teknikikkut atortorissaarutinik aamma inuussutissanik imarmiunik tunngaveqartunik atuinerup pitsaanerulersinnissaanut peqataasut.

· Takornariaqarneq – Suliniutit atlantikup avannaani nunani kulturi aamma pinngortitaq tunngavigalugu takornariaqarnerup atasinnaasumik ineriartortitsinermut tapersersuisut.

· Paasissutissiinermi attaveqatigiinnermilu atortorissaarutit, IKT – suliniutit atlantikip avannaani inuiaqatigiinnik ineriartortitsinermi IKT-p atorneqarneranut tapertaasut.

· Nunap immikkoortuisa sinnerineri suleqatigiinneq, angallanneq nunallu immikkoortuini piujuartitsineq – Suliniutit atlantikup avannaani inuiaqatigiit inukitsut, angallannermut tunngasut aamma piujuartitsineq tunngavigalugu ineriartornermut nukittorsaasut.

Tapiissutit annerusumik suliffeqarfinnut imaluunniit suliffeqarfinnut ilisimatusarfinnik suleqatigiiffillu ineriartortitsiviusunik suleqatigiittunut tunniunneqartarput. Assersuutigalugu attaveqarfinnik ineriartortitsinernut, ilisimatusarnermi sammisunik suliniutinut aamma suliniutinik ineriartortitsinernut tapiisoqarsinnaalluni. EU-mi suliniummi Northern Periphery Programme-p (NPP) iluani attaveqarfinnik suliniutinut annertunerusunut ineriartortinneqarsinnaasunik suliniutinut qinnuteqaatinik NORA takusaqarusuppoq. 2007-imiit NPP nutaaliornermik unammilleqatigiinnermillu ineriartortitsinerup kiisalu pinngortitamik inuiaqatigiinnilu isumalluutinik piujuartitsineq tunngavigalugu atuinerit iluanni suliniutinut tapiissuteqarsinnaalerpoq. Skotlandip avannaanit aamma Canadap kangianit peqataasunik akuulersitsisunik NORA aamma qinnuteqaatinik tigusaqarusuppoq.