Qupperneq taanna Inuussutissarsiummik Ingerlataqartunik Nalunaarsuiffimmi nassuiaatinut killiliinernullu tunngatillugu apeqqutaasinnaasunut paasititsinissamut iluaqutissatut eqqarsaataavoq. Annertunerusumik apeqqutigineqartut e-mail ger@nanoq.gl imaluunniit faxikkut nr. 346577 imaluunniit allakkatigut nalinginnaasutigut Postboks 1605, 3900 Nuuk aqqutigalugu Akileraartarnermut Aqutsisoqarfimmut toqqaannartumik saaffiginnissuteqarnikkut akissuteqarfigineqarsinnaapput.
Suliffeqarfiit
Taaguut suliffeqarfiit aamma inuussutissarsiuteqartut nalunaarsuiffimmi annertuumik isumaqartinneqarpoq. Taaguummi ilaatinneqarput suliffeqarfiit pisortanit pigineqartut namminersortullu:
-
Aningaasaqarnikkut iluanaaruteqarnissamik anguniagaqartut.
-
Aningaasaqarnikkut iluanaaruteqarnissamik anguniagaqanngikkaluarlutik taamaattoq akiliisoqarneratigut sullissisut ilaannakuusumillu niuernikkut ingerlatsinermi tunngaviit malillugit ingerlataqartut.
-
Kiisalu pisortanit ingerlatat, taaguutip isumaa annertunngitsoq atorlugu inuussutissarsiummik ingerlataqartutut isigineqanngitsut.
-
Kiisalu aamma peqatigiiffiit suleqatigiiffiillu taaguummut ilaatinneqarput. Imatulli killeqartinneqarluni taaguummut ilaatinneqarniarunik pisortani oqartussanut naleqqiullutik paasissutissiinissamut pisussaaffeqarlutik. Assersuutigalugu peqatigiiffik akissarsisitsisartoq.
Ingerlatsivik inatsisitigut pisinnaatitaasoq
Taaguummi ingerlatsivik inatsisitigut pisinnaatitaasumi pineqarput inuussutissarsiummik ingerlataqartut namminersortut imaluunniit sulisitsisut, soqutigisaqaqatigiillutik ingerlatseqatigiiffiit, piginneqatigiiffik assigiinngitsunik akisussaassuseqartunik ilaasortalik, aningaasaateqarfiit, aktiaateqarluni aamma piginneqatigiilluni ingerlatseqatigiiffiit, piginneqatigiiffiit, suliffeqarfiit killeqartumik akisussaaffillit, peqatigiiffiit aamma kattuffiit namminerisaminnik inatsisitigut pisinnaatitaaffeqartut.
Kiisalu Namminersorlutik Oqartussat, kommunit, kommunit peqatigiit, naalagaaffimmilu oqartussat aamma ingerlatsivittut inatsisitigut pisinnaatitaasutut nassuiarneqarput. Kiisalu danskit nunallu allamiut immikkoortortaqarfiit taaguummut ilaatinneqalutik.
Inuussutissarsiummik Ingerlataqartunik Nalunaarsuiffimmi ingerlatsivittut inatsisitigut pisinnaatitaasut tamarmik IIN-normumik tunineqartarput.
Ingerlatsivik
Ingerlatsivimmi pineqarpoq suliffeqarfiup ilaa aaqqissuussaanermigut killilerneqarsimasoq, sumiinneratigut imaluunniit ingerlataqarnermigut killilerneqarsimalluni. Suliffeqarfiit arlallit najugaqarfimmi ataasiinnarmiipput ataasiinnarmillu imaluunniit annerusumik nioqqutissamik ataasiinnarmik imaluunniit sullissinernik nioqqutissiortuullutik/sanaartortuullutik, taamaattumillu ingerlatsivik ataasiinnaalluni. Suliffeqarfiit allat arlalinnik sumiiffeqarsinnaapput ingerlatsivittut nassuiarneqarsinnaasunik. Kiisalu suliffeqarfiit ilai najugaqarfimmi ataatsimi pingaarnertut arlalinnik ingerlataqarsinnaallutik. Taakku, pingaarnertut ingerlataat suliaqarfinnut assigiinngitsunut tunngassuteqarpata, aamma ingerlatsivinnut immikkoortiterneqarsinnaapput.
Ingerlatsiviit tamarmik D-normumik tunineqartarput.
Suliaqarfik
Inuussutissarsiummik Ingerlataqartunik Nalunaarsuiffimmik pilersitsinermut atatillugu kalaallit suliaqarfiit pillugit nalunaarsuiffik, kingullermik GB2000 suliarineqarsimavoq. GB2000-mi aallaaviuvoq danmarkimi suliaqarfinnut ilisarnaatit DB93 aamma NACE, kalaallilli nunaanni inuussutissarsiutini pissutsinut naleqqussarneqarsimalluni. Suliaqarfinnut ilisarnaatini tunngaviusut sukumiinerusumik misissorlugit atuarusukkuit una tooruk.
Suliaqarfinnut ilisarnaasersuinermi Akileraarnermut Pisortaqarfik akisussaasuuvoq. Suliffeqarfiit/ingerlatsiviit pingaarnertut ingerlataat aallaavigalugit suliffeqarfiit ingerlatsiviillu suliaqarfittut ilisarnaasersorneqartarput. Suliffeqarfimmi pingaarnertut ingerlataq tassaavoq nalimik annertusisitsinerpaaq.
Pisuni amerlanerpaani suliffeqarfik/ingerlatsivik ajornartorsiutitaqanngitsumik suliaqarfittut ilisarnaasersorneqarsinnaasarput. Pisuni immikkuullarissuni suliaqarfittut ilisarnaasersuineq annertussutsinik naliliineq aallaavigalugu ingerlanneqartarpoq. Suliaqarfinnik ilisarnaasersuinermut tunngatillugu nalorninerit, apeqqutit naammagittaalliuutillu e-mail ger@nanoq.gl imaluunniit faxikkut 346577 imaluunniit allakkatigut nalinginnaasutigut Postboks 1605, 3900 Nuuk aqqutigalugu Akileraartarnermut Aqutsisoqarfimmut saaffiginnissuteqarnikkut akissuteqarfigineqarsinnaapput.
Tamakkiisumik akisussaaffeqarluni piginnittoq
Tamakkiisumik akisussaaffeqarluni piginnittoq killilersorneqanngitsumik aamma "piginnittut arlaliutillugit" assigiimmik pisussaaffeqarluni pisuussutini tamakkerlugit akiliisussaatitaavoq. Inuup ataatsip suliffeqarfiutaanik, soqutigisaqaqatigiiffimmik aamma piginneqatigiiffimmik assigiinngitsunik akisussaassuseqartunik ilaasortalimmik ingerlataqarnermi piginnittut tamakkiisumik akisussaaffeqartussaapput, soorlu aamma piginneqatigiiffiit aamma tamakkiisumik akisussaaffeqarlutik piginnittuusinnaasut.
Tamakkiisumik akisussaaffeqarluni piginnittoq tassaasinnaavoq inuk, CPR-normumik ilisarnaatilik, Naalagaaffeqatigiiffiup iluani angerlarsimaffilik imaluunniit ingerlatseqatigiiffiusinnaalluni alla IIN-normumik imaluunniit CVR-normumik ilisarnaateqarluni Naalagaaffeqatigiiffiup iluani angerlarsimaffilik.