Qularnaveeqqusertinnissamut periarfissaq

Aallarnisaasunut suliffeqarfinnullu taarsigassarsisitsinermi qularnaveeqqusiisoqarnissaa pillugu qinnuteqartoqarsinnaavoq. Taarsigassarsinerup 50%-ia tikillugu Namminersornerullutik Oqartussat qularnaveeqqusiinerisigut aningaaserivinni aningaasaliissuteqartartunilu annaasaqaratarsinnaanerup annikillisinneratigut inuussutissarsiutini pilersaarutit amerlanerusut aallartinneqarnissaasa imaluunniit ineriartorteqqinnissaasa iluaqusernissaat siunertaralugu aaqqissuussineq pilersinneqarpoq.

Aningaaserivimmit, sparekarsimit, realkreditinstituttimit imaluunnit Nunat Avannarliit Killiit Aningaasaateqarfiannit taarsigassarsianut qularnaveeqqusiisoqarsinnaavoq. Qularnaveeqqusiineq taarsigassarsiat akilersornerisa sivisoqatigissavaat, taamaattorli sivisunerpaamik ukiuni qulini akilersuisoqartussaalluni. Taarsigassarsinerit niueqatigiinnikkut atugassarititaasut malillugit taarsigassarsiaassapput aningaaserivimmiillu imaluunniit aningaasaliisoqarfimmiit nalilersorneqarsimassallutik.

Ingerlatanut makkununnga atatillugu taarsigassarsianut qularnaveeqqusiisoqarsinnaavoq:

1. suliffeqarfimmik pilersitsinissaq

2. kinguaariit nikinnerisa aningaasatigut ajornartoortut ingerlaqqissinnaanissaannut

3. tunisassianik ineriartortitsinermut

4. unnuisarfinnik pilersitsinernut, allilerinernut iluarsaassinernullu

Namminersornerullutik Oqartussat taarsigassarsinermut qularnaveeqqusisuupput, aningaasalli Namminersornerullutik Oqartussat sinnerlugit Nunatsinni Takornariartitsinermut Inuussutissarsiutinullu Siunnersuisoqatigiinnit aqunneqarput, aamma takornariartitsinerup nunamilu inuussutissarsiutit iluanni tunisassianik kiffartuussinernilu ineriartortitsinermik imaluunniit ineriartortitseqqinnermik siunertaqartunut tamatumalu kingorna tunisassiornissamik tuniniaanissamillu siunertaqartunut suliniutinut qinnutigineqarsinnaallutik.

Tunisassianik sullissinernilu ineriartortitsinermut tapiissutinik aningaasaliissutitigut tapiisoqarsinnaavoq. Tapiiffigitissinnaasut tassaapput Kalaallit Nunaanni takornariartitsinermik inuussutissarsiutip aamma nunami inuussutissarsiutit iluanni suliffeqarfiit inuillu. Sulifeqarfiit ataasiakkaat aamma suliffeqarfiit arlaariikkaartut tapiissutinik pissarsisinnaapput.