Aalisarnermut aningaasaliissutinut immikkoortitat pillugit aaqqissuussineq

Aalisarnermut aningaasaliissutinut immikkoortitat siunertaa tassaavoq aalisarnermik inuussutissarsiortut ineriartornerinut siuarsarnerinullu tapiissuteqarnissaq, ilanngullugu inuussutissarsiummi peqataasunut nutaanut isersinnaanerup ajornannginnerulernissaa.

Aalisarnermut aningaasaliissutinut immikkoortitat aalisarnermik inuussutissarsiornerup inuiaqatigiinni sapinngisamik annertunerpaamik iluanaaruteqarnissaq, ilanngullugu aalisarnermi naammassisaqarsinnaassuseq, unammillersinnaassuseq aamma aalisakkanik pisuussutinik aalisarsinnaassutsip ingerlaavartumik naleqqussarsinnaanera pitsaangerulersillugu kiisalu kalaallit nunaanni aalisarnermut iluaqutaasumik nutarsaanerit siuarsarlugit.

Aalisarnermut aningaasaliissutinut immikkoortitat aqqutigalugit sinerissami qanittumi aalisariutit teknikkikkut pisoqaassutsikkullu ajorsiartornerat malillugu ingerlaavartumik taarsersornerannut nutarternerannullu tapiissuteqarsinnaapput.

Taamaallaat tapiissuteqartoqarsinnaavoq angallatinik nutaanik atornikunillu pisinernut inuussutissarsiornermi atorneqarsinnaasutut akuerisaasunut aammalu siunissami sivisunerusumi aalisarsinnaalluassuseq ingerlatiinnarumallugu aalisarsinnaalluartutut natuaaliaasutullu nalinerneqartunut.

Sinerissap qanittuani aalisarnermi aalisariutinik ingerlaavartumik taarsersuinermi nutarterinermilu ilaapput :

• teknikkikkut atortut,
• sillimaniarnermi atortut, teknikkikkut atortut allat,
• aalisarnermi atortut atortullu tamakku assigisaat,
• suliniullu piviusunngortinniarlugu teknikkikkut aningaasatigullu pisariaqartumik siunnersorneqarneq.

Aalisarnermut aningaasaliissutinut immikkoortitat aamma Kalaallit Nunaata aalisarnikkut pisuussutaanik ineriartortitsinermut taakkuninngalu atuinermut iluaqutaasutut nalilerneqartunut ingerlatsinissamut tassalu:

• misiliutigalugu nutaanik suliniutinik pilersitsinernut,
• misileraalluni aalisarnernut assigisaanulluunniit tapiissutinik tunniussisoqarsinnaavoq,
• tassunga ilanngullugu imartap aalisarnikkut periarfissaanik,
• immikkut aalisagaqarneranik aamma aalisarnerup allanngortinneqarsinnaaneranik periarfissanik misissuinernut;
• aalisarnermi atortunik pitsanngorsaaneq naammassisaqarnerulersitsinerlu, aalisariaatsinik allanik misileraaneq sungiusarnerlu;
• ataavartitsiniarluni suliniutinik killilersuinermilu periutsinik misileraanerit, ilanngullugit
• aalisarnermi atortunik immikkoortiterisinnaasunik qajassuussisinnaasunillu inerisaaneq misileraanerlu;
• aningaasaqarnikkut iluanaaruteqarnerup pitsaanerulernissaa siunertaralugu tunisassianik aamma tunisassioriaatsinik pioreersunik inerisaaqqinneq pitsanngorsaanerlu;
• aalisakkanik tukertitsivinnik pilersaarusiornissamut misissuinerit ineriartortitsinermilu suliniutit.

Aalisarnermut aningaasaliissutinut immikkoortitat tunngavigalugit tapiiffigineqarnissamut qinnuteqassagaanni, qinnuteqaat imaqassaaq:

• suliniutip siunertaanik isumaanillu nalunaarut;
• ingerlatsinermi aningaasaqarnermilu missingersuutit tapiiffigitinnissamut pisariaqartinneqartut annertussusiinik nalunaarut;
• suliniummi peqataasunik piginnittunillu tamanik nalunaarut;
• suliniummik aqutsineq aqutsisullu pisinnaasaannik allaaserinninneq;
• suliniutip naammassineqarnissaanut piffissaliussaq;
• teknologi, atortut, tunisassiornermi atortut angallallu atorneqartussaq pillugit pingaarnersiorlugit allaaserisaq;
• pilersaarummi tunisassianik tunitsiviit aqqutigineqartussat pillugit nalunaarut.

Qinnuteqartup aamma qinnuteqaammut:

• pisassiissutinut,
• aalisarsinnaanermut akuersissutinut imaluunniit akuersissutinut pisariaqartunut piumasaqaataasoq aalisarnermut aningaasaliissutinut immikkoortitat pillugit inatsit malillugu aningaasatigut tapiiffigineqarnissaq;
• avataanit atortitsisartut aningaasaliisinnaanerannik neriorsuut imaluunniit
• pilersaarutip aningaasartuutitassai tamarmiusut eqqarsaatigalugit nammineq (aningaasartuutit 90 %-ii raajarniarnermut kiisalu aalisarnermut allamut raajarniarnermuunngitsoq aningaasartuutit 80 %-ii);
• suliffeqarfimmik isumaqatigiissutinillu tassunga atasunik piginnittuuneq kiisalu inuussutissarsiornermut pisortaniit taarsigassarsiat.

Raajarniarnermi pisinermi nalingata tamarmiusup 10 %-ia tikillugu tapiisoqarsinnaavoq. Raajaanngitsunik aalisarnerni allani pisinermi nalingata 20 %-ia tikillugu.

Pisinermi nalingata tamarmiusumut ilaapput:

• angalllat teknikkikkut pisariaqartunik ikkussuiffigineqarsimasoq;
• isumannaallisaanermi atortut;
• teknikkikkut ikkussukkat allat; aalisarnermi atortut assigisaallu ingerlatsinermut atortut allat kiisalu
• suliniutip naammassineqarnissaanut teknikkikkut aningaasaqarnikkullu siunnersuinerit pisariaqartut.

Suliniutinut nutarterisunut suliniummi aningaasartuutit 50 %-ii tikillugit tapiisoqarsinnaavoq. Suliniummi aningaasartuutinut ilaapput:

• misissuinerit;
• pisiat, kisiannili tassunga ilaanatik angallatit, illut atortullu aalajangersukkat allat kiisalu
• teknikkikkut, aningaasatigut biologinillu siunnersorneqarnerit.