Inuussutissarsiutit siuarsarneqarnissaannut immikkoortitat - NUKIIT

Inuussutissarsiutit siuarsarneqarnissaannut immikkoortitanit "Nukiit"-nit, nunami inuussutissarsiutinik ingerlatanik amerliartortitsinissaq aamma nunap immikkoortuini imaluunniit nuna tamaat isigalugu, inuussutissarsiutinik ineriartortitsinerup nukittorsarneqarnissaanut killissarititaasunik piumasaqaatinik pilersitsinissami ingerlatassanut tapiissuteqartoqartarpoq. Inuussutissarsiutinik ingerlatanik siuarsaanissaq, takornariartitsinermik ingerlatat aamma/ imaluunniit ingerlatanik piginnaalersitsisunik suliassaqarfiup iluani suleqatigiinnikkut imaluunniit attaveqarfissanik pilersitsinissat siunertaralugit, immikkoortitat pilersinneqarput. Aammattaaq siunertami ilaasinnaapput nunat tamalaat akornanni ingerlatanut peqataaneq, tassani nunap immikkoortuini aamma nuna tamakkerlugu inuussutissarsiutinik siuarsaanermi aamma ilisimasanik aamma piginnaalersitsisunik ineriartortitsinermi. Immikkoortitat Nukiit tunngaviusumik suliniuteqartut ataasiakkaat qinnuteqaataannut tapiissuteqarneq ajorput.

Suliniutinut aningaasartuutinut 50 % – taamaattorli annerpaamik 200.000 kr..-it tikillugit immikkoortitanit tapiissuteqartoqartarpoq. Qinnuteqartup nammineq aningaasaliissutai tassaasinnaapput nammineq aningaasaataanit, aningaasaateqarfimmit, nunanit allanit tapiissuteqartitsisarnernit aaqqissuussinernit, nunamit namminermit immikkoortitanit, – taamaattorli nunami inuussutissarsiutit siuarsarneqarnissaat pillugu Namminersornerullutik Oqartussat tapiissuteqartarnerinit allanit pissarsiaanngitsunit, pisut. Suliniutinut ineriartortitsiviusunut matumani assersuutigalugu attaveqarfissanik pilersitsiniaanermi, tuniniaanissamut suliniutinut aamma angalanernut ineqarnernullu aningaasartuutinut tapiissuteqartoqarsinnaavoq. Nalinginnaasumik suliffeqarfiup nammineq iluani ingerlatsinermut aningaasartuutinut soorlu qinnuteqartup nammineq sulisuinut il.il. aningaasarsianut tapiissuteqartoqarsinnaanngilaq.

Qinnuteqartorpiaat paasissutissanik eqqornerusunik pissarserusuttut malittarisassat ataani taaneqartumi aaneqarsinnaasut atuarsinnaavaat.

Qinnuteqaateqarnissamut periaaseq

Qinnuteqaateqarnermut immersugassaq Inuussutissarsiornermut Pisortaqarfiup Inuussutissarsiornermut Immikkoortortaanut nassiunneqassaaq.

QINNUTEQAATEQARNISSAMUT IMMERSUGASSAQ 

Pisoqarsimaneranik nalunaarusiornissamik immersugassaq 

NAJOQQUTASSAT