Misigititsiniarnermik suliffeqarfiit

Tunisassiat aamma misigisat tunngavigalugit najoqqutassiat iluanni misigisaqartitsiniarnermik ingerlataqarneq niuernikkut pitsaasunik periarfissarpassuaqarpoq. Misigisaqartitsiniarnermik ingerlataqarneq nunarsuaq tamakkerlugu annertuujuvoq niuerfiullunilu sukkasuumik alliartortoq tassungalu atatillugu Kalaallit Nunaat suliaqarfinni assigiinngisuni arlalinni siuartornermik pilersitsinissamut periarfigissaartorujussuuvoq aamma suliaqarfiit suliaqartullu assigiinngitsut akornanni siunnerfilimmik suleqatigiinnikkut nunarsuaq tamakkerlugu msigisaqartitsisarnernut ilaalersinnaalluni – takornariartitsinermut, inuussutissarsiutinut nunatsinnilu kulturimut iluaqutaasumik.

Misigisaqartitsiniarnermik ingerlataqarneq aliikkusersuinermut misigisaqartitsinermullu sammisuuvoq, tamannalu takornarissat nunamut tikeraarniartut akornanni annertusiartortumik piumasarineqarluni. Tamatuma malitsigisaanik misigisaqartitsiniarnermik ingerlataqarneq nunap tamarmiusumik aningaasaqarneranut annertusiartuinnartumik pingaaruteqaleriartorpoq, Kalaallillu Nunaat kultureqarnermigut, oqaluttuarisaaneq minnerunngitsumillu pinngortitaq asseqanngitsoq tunngavigalugit misigisat piumaneqartut tunisassiarinissaannut toqqammavissagissaarluni.

Misigisaqartitsiniarnermik ingerlataqarnerup ineriartortinnera suliaqarfiit isumassarsiorsinnaasorpassuit akornanni suleqatigiinnermik tunngaveqassaaq soorlu nipilersorneq, isiginnaartitsineq, filmi, eqqumiitsuliorneq, qalipaaneq qitinnerlu – aamma inuussutissarsiutit taakkununnga attuumassuteqartut misigisaqartitsinissamut sammisunik tunisassiornermik ingerlatitseqqiusinnaallutillu tuniseqqinnermik ingerlatqarsinnaapput.

Misigisassanik tunisassiornermi suliaqarfiit peqataasorpassuillu akuliutsippai – tassunga ilanngullugu eqqumiitsuliortuniit suliaqarfiillu isumassarsiorsinnaasut aamma tusagassiisarfiit, angalatitsisarfiit, angalassisartut neriniartarfiillu.

Kiisalu misigisassanik tunisassiorneq illoqarfiit, nunap immikkoortuisa akornanni nunalu tamakkerlugu suleqatigiinnermik tunngaveqarpoq takornariagassanik ingerlatseqatigiiffiit, takornariaqarnermi siunnersuisoqatigiit, pisortat, kulturimut illorsuit allarpassuillu peqataatillugit.