Erngup nukinganik innaallavissiorfeeqqanut qularnaveeqqusiineq

2009-mut Inatsisartut aningaasanut inatsisaat kontu pingaarneq 51.07.45 oqaasertaliussaq nr. 3 naapertorlugu

takuneqarsinnaavoq,

Aningaaserivinnut, erngup nukinganik innaallagissiorfeqqanik nammineq pigisanik, savaatilimmit ataatsimit imaluunniit savaatilinnit arlalinnit ataatsimut sananissamut taarsigassarsiassat 90%-iinik akiitsortitsisartunut qularnaveeqqusiinissamut Naalakkersuisut piginnaatinneqarput. Taarsigassarsianut katillugit 10 mio. koruunit angullugit amerlassuseqartunut qularnaveeqqusiisoqarsinnaavoq.

• Taarsigassarsiat tunniunneqarnerisa nalaani inuit suliffeqarfiilluunniit Kalaallit Nunaanni inuutissarsiutigalugu savaateqarnermik ingerlatsinissamut pisinnaatitaasut taarsigassarsiaannut qularnaveeqqusiisoqarsinnaavoq
• Qularnaveeqqusiisoqassappat nunalerinerup aningaasaqarnerullu naliliiffigineqarneri taarsigassarsititsinissap naapertuuttutut isumaqarfigineqarnissaa piumasaqaatigineqarpoq
• Qularnaveeqqusiissuteqarnermi Nunatta Karsianut akiligassanngortinneqartussat piffissap qanorluunniit ilinerani akiitsut sinnerisut amerlassusilerneqartassapput, soorlumi taarsigassarsiat aallaqqaammut amerlassusaat qularnaveeqqusiiffigineqartussaasoq, tassami qularnaveeqqusiinermut taarsigassarsititsisup erniarititat akitsuusiussallu ilaatinneqanngillat

Qulaani taaneqartut naapertorlugit Aalisarnermut, Piniarnermut Nunalerinermullu Naalakkersuisoqarfiup aalajangerpaa qinnuteqaat suliarineqartinnagu qinnuteqartoq uppernarsaatit ukua pissarsiareqqaassagai:

1) Qinnuteqartup akiliisinnaassuseqarneranut tunngatillugu aningaaserivimmit oqaaseqaat

2) Pilersaarusiamut missingersuut ukuninnga imaqartoq;

• Sipaarutissatut ilimagineqartut massakkut innaallagissamut aningaasartuutaasunut naleqqiullugu
• pisiortorfimmiit neqeeroorut

3) Teknikkumut peqataasumit arlaannulluunniit suliamut peqataanngitsumit oqaaseqaat

4) Oqartussaasunit akuersissut;

• Nunaminertamik akuersissuteqarnissamut piumasarineqartut nalinginnaasut naammassineqarsimassapput