Nunalerineq pillugu Siunnersuisoqatigiit

Nunalerineq pillugu Siunnersuisoqatigiit Naalakkersuisunut siunnersuisartuupput apeqqutini nunalerinermut tunngasuni. Nunalerineq pillugu Siunnersuisoqatigiit nunalerinermik inuussutissarsiortunut sinniisunik inuttaqarpoq.

Nunalerineq pillugu Siunnersuisoqatigiit aalajangersimasunik suliassanik isumaginnittartuupput, Naalakkersuisuniit isumagisassanngortinneqarsimasunik Naalakkersuisunullu oqaaseqaateqarsinnaallutik Kalaallit Nunaanni nunalerinikkut iluarsaassinerup iluani suliniutit nutaat pillugit. Tamakku saniatigut Siunnersuisoqatigiinnit nunalerinermut tunngasutigut apeqqutit Naalakkersuisuni suliareqqinneqartariaqanngitsut suliarineqartarsinnaapput.

Nunalerineq pillugu Siunnersuisoqatigiit namminerisaminnik suliniuteqarnermikkut Naalakkersuisut kaammattorsinnaavaat nunalerineq pillugu inatsisiliornermi atuuttumi suliniutissanut nutaanut siunnersuusioqqullugit allannguuteqaqqullugilluunniit.

Tamakku saniatigut Nunalerineq pillugu Siunnersuisoqatigiit Nunalerinermut Siunnersuisoqarfimmut, Upernaviarsummi Misileraavimmut kiisalu Upernaviarsummi Savaatilinngorniat atuarfiannut ingerlatsinermut tunngasutigut siulersuisutut atuupput.

Nunalerineq pillugu Siunnersuisoqatigiit imatut inuttalersugaapput:

• SPS (Savaatillit Peqatigiit Suleqatigiissut), marlunnik sinniisullit,
• Nunalerinermut Siunnersuisoqarfik,
• Nanortalik Kommune,
• Qaqortoq Kommune,
• Narsaq Kommune,
• Neqi A/S,
• Inuussutissalerinermut ministeriaqarfik aamma Islandimi Nunalerinikkut Ilisimatusarfeqarfik.
• Taakku saniatigut Aalisarnermut, Piniarnermut Nunalerinermullu Naalakkersuisoq ilaasortassanik marluk angullugit toqqaasarpoq Kalaallit Nunaanni nunalerinermi inuussutissarsiuteqarnermut annertuumik ilisimasaqarluartunik.

Nunalerineq pillugu Siunnersuisoqatigiinni aalajangersimasumik ataatsimeeqataasartut tassaapput soqutigisaqaqatigiit oqartussaasullu:

• Savaateqarnermut Allaffissornikkut allaffeqarfik,
• Nunalerinermut Siunnersuisoqarfik,
• Savaatilinngorniat atuarfiat,
• Pinngortitaleriffik,
• Inuussutissarsiutinut immikkoortortaqarfiup allattoqarfia kiisalu
• Avatangiisinut Pinngortitamullu Pisortaqarfik.

Nunalerineq pillugu Siunnersuisoqatigiinni siulittaasoq toqqarneqartarpoq Nunalerineq pillugu Siunnersuisoqatigiinnit aamma Aalisarnermut, Piniarnermut Nunalerinermullu Naalakkersuisumit inassuteqartoqarnerata kingorna. Siunnersuisoqatigiinnut allattoqarnikkut sullissineq isumagineqartarpoq ataatsimoorussamik allattoqarfimmit inuttaqartumik Allattoqarfiup Inuussutissanut immikkoortortaqarfianit aamma Nunalerinermut Siunnersuisoqarfimmit. Ulluinnarni aqutsisunik pilersitsisoqarnikuuvoq inuttaqartumik siulittaasumit, siulittaasup tullianik kiisalu Nunalerineq pillugu Siunnersuisoqatigiinni ilaasortanik pingasunik.

Nunalerineq pillugu Siunnersuisoqatigiit sulinini pillugu ukiumoortumik Naalakkersuisunut nalunaarusiortarput.

Kiisalu aningaasaliissutinit matussuserneqartarput savaateqarfiusuni illoqarfiit nunaqarfiillu avataanni sanaartornernut aamma aqquserniornernik aserfallatsaaliinernut aningaasartuutit. Matumani pineqarput aqquserniornerit Nanortalimmi, Qaqortumi aamma Narsap kommuniini inissisimasut.

Sanaartugassatigut suliat kommunit Namminersorlutik Oqartussallu akornanni suleqatigiinnikkut ingerlanneqartarput, tassami kommunit pineqartut suliassanik isumaginnittartuummata. Pilersaarusiorneq pingaarnersiuinerlu pisarpoq Nunalerinermut Siunnersuisoqarfik Nunalerineq pillugu Siunnersuisoqatigiit ataanniittoq isumasioreerlugu. Naatsorsuutigineqartarpoq kommunit pilersaarutinut assigiinngitsunut aningaasat amerlaqataannik aningaasaliissarnissaat.

Siunertaavoq, savaateqarnermik inuussutissarsiutip ineriartortinneqarnerani pisariaqartunik attaveqarfilersuinerup aserfallatsaalineqarnissaa annertusarneqarnissaalu. Ilanngullugu aqquserniornerit sumiiffinni takornariartitsinikkut ineriartornermut iluaqutaapput. Konto-mut tassunga aningaasaliissutinit matussuserneqartarput ilaatigut aqqusinernik tamakkuninnga aserfallatsaalineq pitsanngorsaanerlu kiisalu aqqusinernik nutaanik pilersitsiortuinerit. Aningaasaliissutinit annertunerpaat atorneqartarput aqqusinioreersunit aserfallatsaaliinermut pitsanngorsaanernullu.

Pisariaqartitsisoqassappat kommunini pineqartuni sanaartornerni sulinernut tapiissutitigut agguataarisimanerup allanngortinneqarnissaa, Aalisarnermut, Piniarnermut Nunalerinermullu Naalakkersuisoq piginnaatinneqarpoq Nunalerineq pillugu Siunnersuisoqatigiit kommunillu attuumassuteqartut tusarniareerlugit, agguataarisimanermik allanngortitsisinnaanermut.

Aningaasaliissutaasunik inaarutaasumik pingaarnersiuineq siunertat taakku marluk assigiinngitsut akornanni pisarpoq una anguniarlugu, nunalerinermut politikkip pingaarnerusup tapersersorneqarnissa pisarnissaalu Nunalerineq pillugu Siunnersuisoqatigiinnit Nunalerinermut Naalakkersuisumut inassuteqartoqareernerata kingorna.