Pisassiissutit siunnersuinerlu

Saamia tungaani toqqarsinnaavatit pisassiissutit uumassusilerisunillu siunnersuinerit. Timmissanut miluumasunullu imarmiunut immikkoortinneqarput

Inatsisitigut tunngavik
Piniarneq aallaaniarnerlu pillugit Inatsisartut inatsisaat nr. 12, 29. oktober 1999-imeersoq Kalaallit Nunaanni piniarnermut aallaaniarnermullu tunngatillugu pisortat killilersuinerannut tunngaviuvoq. Piniakkanut assigiinngitsunut killilersukkanut nalunaarutit atuuttunut innersuussisoqarpoq. Aammattaaq kommunini ataasiakkaani kommunalbestyrelsit maleruaqqusat aqqutigalugit suli sukanganerusunik killilersuinissamut periarfissaqarput.

TAC
Naalakkersuisut tassaapput ukiut tamaasa ukiumut imaluunniit pisassiivik iluani akuerisaasumik katillugit pisarineqarsinnaasunik aalajangersaasartut, ulluinnarni taaneqartartoq TAC (Total Allowable Catch). Piniakkanut ataasiakkaanut immikkut TAC-imik aalajangersaasoqartarpoq kiisalu pisassiissutit ilaannut pisassiissutit agguataarneri aamma aalajangersarneqartarlutik.

Pisassiissutit
Pisassiissutit imatut paasineqassaaq immami nunamiluunniit aalajangersimasumi aalisarnikkat imaluunniit piniakkanut aalajangersimasunut tunngatillugu nunap pisarisinnaasaatut aalajangersarneqartut. Piniakkat ilaannut tunngatillugu peqassutsit ilaat nunanut sanilerisatsinnut avitseqatigiiffigaagut. Soorlu avannaata kitaani nanoqatigiit siaruarsimanerat Canadamut killeqarfik akimorlugu Canada oqartussaaffigisaanut siaruaqqapput.

Pisassiissutit agguaanneqarneri
Ataatsimut isigalugu TAC imaluunniit pisassiissutit sumiffinnut aalajangersimasunut siaruarsimaffeqartunut kommuninut imaluunniit aqutsiveqarfinnut agguarneqartarput. Tamanna Aalisarnermut, Piniarnermut Nunalerinermullu Naalakkersuisumit isumagineqartarpoq, soqutigisaqaqatigiiffiit susassaqartut soorlu KNAPK, TPAK aamma KANUKOKA tusarniaaffigereernerisigut. Taamaattoq Piniarnermut Siunnersuisoqatigiit tamanna sioqqullugu tusarniaaffigeqqaarneqartarpoq. Piniakkat ilaannut inatsisiliorneq pisinnaatitsivoq piniakkat ilaannut pisassiivisup iluani pisassiissutit nungunneqanngippata pisassiissutit sinnerussinnaasunik  aqquaasseqqittoqarsinnaaneranik.

Uumassusilerisunit siunnersuineq
Uumassusilerisunit siunnersuineq Pinngortitaleriffimmit isumagineqarpoq. Uumasut miluumasunut timmissallu peqassutsit nakkutigineri aamma ilisimatusarneq tunngavigalugu siunnersuineq ingerlanneqartarpoq. Aammattaaq nunat tamat akornanni suleqatigiiffiit soorlu NAMMCO (North Atlantic Marine Mammal Commission) suleqatigineqarput.