Miluumasut imarmiut

Tulliutoq malugiuk
Kommunit ilaanni uumasut ilaasa piniagaasarfii piniarnermullu atortut pillugit malittarisassat kommunit ileqqoreqqusaasigut allanngortitaasimasarput. Taamaattumik nalorniguit kommuni najugaqarfigisat saaffigissavat.

Nanoq
Piaqqat arnavissallu ataatsimik arlalinnilluunniit piaqqisartut Kalaallit Nunaanni eqqissisimatitaalluinnarput. Naalakkersuisut ukiumoortumik pisassiisarput, Nannut illersorneqarnissaat piniarneqarnerallu pillugit Namminersornerullutik Oqartussat nalunaarutaat nr. 21, 22. september 2005-imeersoq naapertorlugu. Nalunaarut pillugu ilitsersuut suliarineqarsimavoq, uani aasinnaavat. Pisassiisarneq atuutsinneqalermat ukioq pisassiivik siulleq tassaavoq 2006.

Inuussutissarsiutigalugu piniarsinnaanermut atuuttumik allagartallit akuersissummillu peqartut kisimik nannunniarsinnaatitaapput.

Illoqqortoormiut aamma Tasiilap aqutsiveqarfiini nannunik angutivissanik inersimasunik arnavissanillu inersimasunik piaqqisanngitsunik piffissami 01. oktoberimiit 31. juli tikillugu, ullut taaneqartut ilanngullugit, killilersugaasumik nannunniarneq ajornanngilaq. Aqutsiveqarfiit sinnerini angutivissat inersimasut arnavissallu inersimasut piaqqisanngitsunik piffissami 1. septemberimiit 30. junimut, ullut taaneqartut ilanngullugit, killilersugaasumik nannunniarneq ajornanngilaq.

Tikaagulliusaaq, qipoqqaq, arfivik aamma tikaagullik
Tikaagulliusaamik piffissaq piniarfissaq tassaavoq 1. januarimiit 31. decemberimut. Arfivik, qipoqqaq aamma tikaagullimmut tunngatillugu piffissaq piniarfissaq tassaavoq 1. aprilimiit 31. decemberimut. Arfernut taamanut Arfanniarneq pillugu Ataatsimiititaliarsuaq (International Whaling Commission) ukiut tallimakkuutaarlugit pisassiisarpoq. Piffissaq pisassiiviusoq maannakkut atuuttoq tassaavoq 2007-imiit 2012 ilanngullugu. Inuussutissarsiutigalugu piniartut najukkaminni kommunimut qinnuteqartut kisimik arfanniarsinnaapput. Arnavissat piaqqisartut pillugit immikkut ittumik eqqissisimatitsineq pillugu malittarisassat, arferup takissusaa, piniarsinnaanermut akuersissutit kiisalu piniarnermi atortut pillugit malittarisassat Arfernik angisuunik illersuineq piniarnerlu pillugit Namminersorlutik Oqartussat nalunaarutaat nr. 11, 16. juli 2011-meersumi takukkit.
Aammattaaq arfattat nalunaarutigineqarnissaannut malittarisassat Arfattat angisuut pissatallu nalunaarutigineqartarnerat pillugu Namminersorlutik Oqartussat nalunaarutaat nr. 12, 16. juli 2010-meersumi takuneqarsinnaapput.

Puisit
Piffissaq piniarfissaq tassaavoq 1. januarimiit 31. decemberimut. Puisinniarnissamut piniarnermut allagartaq imaluunniit akiliuteqarluni piniarnissamut akuersissummik atuuttumik peqarnissaq piumasaqaataavoq. Arnavissat milutsitsisut aamma piaqqat miluttut eqqissisimatitaapput. Taamatullu piaqqat qiviullit eqqisisimatitaapput. Qasiaq kiisalu puisi sigguttooq nunatsinni tamarmi eqqissisimatitaalluinnarput. Nunanut allanut annissinermut kiisalu piniarnermut atortut pillugit malittarisassat erseqqinnerusumik atuarsinnaavatit Puisinik illersuineq piniarnerlu pillugit Namminersorlutik Oqartussat nalunaarutaat nr. 16, 12. november 2010-meersumi.

Aaveq
Arnavissat aamma arnavissat piarallit ukioq kaajallallugu eqqissisimatitaalluinnarput. Tamaattoq Qaanaap aqutsiviani arnavissat piaqqallu piniarneqarsinnaapput. Naalakkersuisut aarrinik ukiumut pisassiissutinik aalajangersaasarput. Kitaani allorniusat 66^o-ip kujataaniittut ukioq naallugu eqqissisimatitaalluinnarput. Kitaani allorniusat 66^odm;N aamma 70^odm;30^oN akornanni piffissaq piniarfissaq tassaavoq 1. martsimiit 30. aprilimut. Kitaani allorniusap 70^odm;30^oN avannaani kiisalu Tunumi Nuna Eqqissisimatitaasup kujataani piffissaq piniarfissaq tassaavoq 1. oktoberimiit 30. juni ilanngullugu.

Inuussutissarsiutigalugu piniarsinnaanermut atuuttumik allagartallit kisimik aaffanniarsinnaatitaapput.

Qilalukkat qanortat qernertallu
Piffissaq piniarfissaq tassaavoq 1.januarimiit 31. decemberimut. Qilalugarniaqataassagaanni piniarnermut allagartaq aamma akuersissummik atuuttumik peqarnissaq piumasaqaataavoq. Qilalugaqatigiit qaqortat qernertallu sumiiffinnut aalajangersimasunut siaruarsimaffeqarput. Naalakkersuisut ukiumut pisassiissutinik aalajangiisarput qilagaqatigiinnut qaqortanut qernertanullu tunngatillugu. Qilalukkat sumiiffinnut siaruarsimanerannut takussutissiaq saqqummersissinnaavat. Tunumi Pinngortitamik Eqqissisimatitsivimmut Qimusseriarsuarmilu pinngortitami eqqissisimatitamut tunngatillugu immikkut ittumik nalunaaruteqarpoq. Akuersissutit, tuniniaaneq kiisalu piniarnermut atortut pillugit malittarisassat erseqqinnerusumik atuarsinnaavatit Qilalukkanik qaqortanik qernertanillu illersuineq piniarnerlu pillugit Namminersorlutik Oqartussat nalunaarutaat nr. 7, 29. marts 2011-meersumi.

Niisa, anarnaq, aarluarsuk (hvidskæving aamma hvidnæse) niisarnaq kiisalu aarluk
Piffissaq piniarfissaq tassaavoq 1. januarimiit 31. decemberimut. Arfernik kigutilinnik mikisunik piniassagaanni piniarnermut allagartamik atuuttumik peqarnissaq piumasaqaataavoq.

Miluumasut imarmiut

Attavissaq

Nannut, puisit arfernullu tunngatillugu piffissat piniarfiusut 2011/2012