Nuttarnerulersitsiniarneq

Nuttarnerulernissamut aningaasaliissutit

Inatsisitigut toqqammaviit: Inatsisartut peqqussutaat nr. 10, 18. dec. 2003-meersoq, taavalu Nuttarnerulernissaq pillugu kaajallaasitaq nr. 24, 25. august 2008-meersoq.
Aningaasanut inatsimmi aningaasaliissutigineqartut iluanni nuttarnerulernissamut aningaasaliisoqartarpoq. Sulinermik inuussutissarsiuteqartut najugaqarfigisamit allaanerusumi suliffissamik nassaarunik isumaqatigiissuteqarlutillu, tamatumali saniatigut inissaqartinneqarlutik, taava periarfissaqarput tapiiffigineqarnissaminnut qinnuteqaateqassallutik.
Qinnuteqarsinnaapput inuit suliffissarsisimasut, nalinginnaasumik sulisitsisumit akiliunneqartanngitsut eqqarsaatigalugit. Tassa matumani pineqarput atorfillittulli nalinginnaasumik sulisitsisuminnit nuunnissamut akiliunneqarsinnaanngitsut.
Suliffissarsisup qinnuteqaatini najugaqarfigisami suliffissarsiuussisarfik suleqatigalugu immersussavaa, tamatumani ilanngunneqassallutik: pisattat poortortinneri nassiunneqarnerillu aningaasartuutit, aapparisap meeqqallu 18-liisimanngitsut billettissaannut aningaasartuutissat. Tamakkua katersoriarlugit Inuussutissarsiornermut Suliffeqarnermullu Naalakkersuisoqarfimmut ingerlateqqinneqassapput, suliffigiligassamit uppernarsaat ilanngullugu.  Naatsorsuutigineqarsinnaavoq pilertortumik akissuteqarfigineqarnissaq. 

Nuttarnerulernissamut aningaasaliissutit

Imminut ilaqutarisallu pilersorniarneranni periarfissat pitsaanerusut immaqalu najugaqarfigisami periarfissaanngitsut, taamaasilluni ujartorneqarsinnaapput, nuunnissamullu aningaasartuutit matussusiivigineqarsinnaallutik. Aamma taamatut alloriarnikkut suliffeqarfiit sulisussaaleqisut ikiorserneqarsinnaapput.

Najugaqarfigisaq qimallugu allami suliartorneq inuppassuarnut periarfissatsialaavoq - alloriarneq imaannaanngitsuusinnaasoq. Taamaattumik nuunnissamut kajumissuseqaruit qinnuigissavatsigit najugaqarfigisanni suliffissarsiuussisarfimmut saaffiginneqqullutit, taakkua siunnersorsinnaassammatit qinnuteqaasiornermilu ikiorlutit.