Inuunermut testamenti
Nammineerluni aalajangiisoqarsinnaavoq
Siornatigut inuunerup sapinngisamik sivisunerpaamik attatiinnarneqarnissaa nakorsap suliassaqarfigigaa qularutissaanngilaq.
Inuunerup sivitsornissaanut ullumikkut nakorsat perisarfissaqalersimanerat inuppassuarnut ajornartorsiutaalersimavoq.
Sianigisaqarani inuunissaq imaluunniit peqqissinissamik neriuutaarunnissaq eqqarsaatigiinnarlugu misigisaasinnaavoq nuanninngitsoq annilaarnartuusinnaasorlu.
Tamannalu tunngavigalugu inuit amerlasuut taamatut pisoqassagaluarpat eqqissillutik toqunissartik kissaatigalugu toqqaannartumik qanigisaminnut oqaatigisarsimavaat.
Inuit inuuginnartinnissaannut teknikikkut atortorissaarutit ullumikkut ima ineriartorsimatigipput, taama pisoqartillugu qanoq iliornissamut nammineerluni sunniuteqaqataanissap eqqarsaatiginissaanut periarfissaqalersimalluni.
Taamaattumik inuunermut testamentiliornissaq inatsisitigut periarfissaqartinneqarpoq
Inuunermut testamenti
Suli peqqikkallarnermi eqqarsarluarsinnaagallarnermilu inuunermut testamentiliornikkut nammineerluni kissaatigisap ataqqineqarnissaa qularnaarneqarsinnaavoq. Inuunermut testamentikkut nakorsaq oqaluttuunneqarsinnaavoq toqu anigorneqarsinnaatinnagu inuunerup sivitsornissaa piinnarlugu katsorsarneqarnissaq kissaatigineqanngitsoq. Aamma oqaatigineqarsinnaavoq ikiorneqarsinnaajunnaaraanni iluarsinissarlu neriuutigineqarsinnaajunnaarpat inuunerup sivitsornissaa piinnarlugu katsorsarneqarnissaq aamma kissaatigineqanngitsoq.
Inuunerup kipineqarnissaanut ikiuunnissaq pineqanngilaq
Ikiorneqarluni inuunerup kipitinnissaanik kissaateqarneq pillugu atsiornissaq pineqanngilaq. Akerlianilli nammineerluni kissaateqarnermik oqarsinnaajunnaarnermi iluarsinissamullu neriuutaarunnermi inuuinnartinneqannginnissamik kissaateqarnermik saqqummiussinerulluni.
Nammineerluni eqqarsarsinnaagallarnermi kissaatigisamillu saqqummiussisinnaaneq soorunalimi ataqqineqassaaq. Testamenti aatsaat atuutilissaaq napparsimasoq nakorsamit qanigisaasunillu attavigineqarsinnaajunnaarpat attavigineqaqqinngisaannarnissaalu paasinarsippat.
Testamenti nalunaarsorneqartussaavoq
Quppersakkap uuma tunuaniippoq testamenti immersugassaq. Immersoreerpat allakkat puuannut ikillugu Rigshospitalimi Inuunermut testamentinik nalunaarsuisarfimmut nassiunneqassaaq - nassitsivissaq immersugassami allermi allassimavoq. Inuunermut testamentit tamarmik Rigshospitalimi nalunaarsorneqartarput nunatsinneersuugunik Danmarkimeersuugunillu. Testamenti Rigshospitalimi tiguneqariarpat tiguneqarneranut uppernarsaat nalunaarsorneqarneranut akiliutissaq 50,- kr. ilan-ngullugu nassiunneqassaaq. Qaammatit marluk qaangiutinnagit akiliutissaq akilereersimassaaq taamaanngippat nalunaarsorsimaffimmit peerneqassaatit.
Testamenti atortariaqalissappat
Napparsimasup inuunermut testamentiliorsimasinnaanerata paasineqarnissaa pisariaqartinneqalissagaluarpat napparsimmavinni, utoqqaat illuini il.il. nakorsat namminneerlutik Rigshospitalimut saaffiginnissinnaajuaannarput. Napparsimasoq nunatsinni Danmarkimiluunniit suliaritissimanera apeqqutaatinnagu pisussaaffik atuuppoq.
Inuunermut testamenti malillugu napparsimasut kissaataannik nakorsat qanoq ilillutik naammassinninnissaat assigiinngilaq.
Toqu anigorsinnaajunnaarlugu katsorsarneqarnissaq kissaatiginagu inuunermut testamentimi oqaatigisimagaanni (testamentimi imm. 1) tamanna nakorsat ataqqisassaraat.
Ikiorneqarsinnaajunnaaraanni iluarseqqinnissamillu neriuutaarussimaneq pillugu (imm. 2) inuunerup sivitsorneqarnissaa siunertaralugu katsorsarneqannginnissaq kissaatigisimagaanni katsorsaanissaq nakorsap isumaliutigisassaraa.
Kikkut allat ilisimatinneqassappat?
Aalajangerneq pillugu qanigisat oqaluttuunnissaat pitsaasuusinnaavoq. Taamatut tassanngaannaq pisoqartillugu qanigisaasunut artornarsinnaasarpoq. Aamma pitsaasinnaavoq aalajangerneq nakorsanut oqaloqitigiissutigissallugu.
Utertitsineq
Peqqissimilissagaluaruit nalunaarsuiffimmut allakkatigut saaffiginnillutit testamenti uterteqqusinnaavat. Taamatuttaaq pisariaqartilissagukku nakorsamut ilinnik katsorsaasumut saaffiginnillutit testamenti uterteqqusinnaavat.
Qanoq iliorluni quppersagaq pissarsiarineqarsinnaava
Najukkanni napparsimmavimmi quppersagaq pissarsiarisinnaavat.