Illuliortiternernut aningaasalersuineq 20-20-60

Inissianik nutaanik sanaartornermut iluarsaassinermullu, illuliortiternernut aningaasalersuineq pillugu Inatsisartut peqqussutaat nr. 1, 7. maj 2007-imeersoq naapertorlugu, Namminersornerullutik Oqartussat taarsigassarsititsisarput.

Nutaamik sananissamut iluarsaassinissamullu qinnuteqaatit Attaveqarnermut Aqutsisoqarfimmit aqunneqarput.

Illuliortiternernut aningaasalersuineq – nutaanik sanaartorneq
Naalakkersuisut kommunillu tamarmik immikkut inissianik nutaanik sanaartornermut aningaasartuutit tamarmiusut 20%-iinik taarsigassarsititsisinnaapput.

Inigisap annertussusaanut annerpaamik 110 m²-nut taarsigassarsititsisoqarsinnaavoq. 65 m²-nut siullernut sanaartornermut aningaasartuutinit tamakkiisunit annerpaamik m²-mut 15.500 koruunit taarsigassarsiaritinneqassapput. 66 m²-niit 110 m²-nut sanaartornermut aningaasartuutinit tamakkiisunit annerpaamik m²-mut 10.250 koruunit taarsigassarsiaritinneqassapput.

Pisortat taarsigassarsiarititaat atuinissamut akuersissutip ullulerneqarneraniit ukiuni 20-ni erniaqartussaanngillat akilersugassaanatillu, tamatumalu kingorna taarsigassarsiat ernialersorneqalissapput ukiullu 15-it ingerlanerini akilersugassanngussallutik.

Illuliortiternernut aningaasalersuineq - iluarsaassinerit
Inissiaq pigisaq ukiut 20-t sinnerlugit pisoqaassuseqarpat, aammalu 95 m²-nit minneruppat iluarsaassinermut, pitsanngorsaanermut alliliinermullu aningaasartuutit tamarmiusut 40%-iinut taarsigassarsitinneqarnissamik Namminersornerullutik Oqartussanut qinnuteqartoqarsinnaavoq.

Naalakkersuisut iluarsaassinermut, pitsanngorsaanermut alliliinermullu taarsigassarsiarititaat annerpaamik 283.500 koruuninik amerlassuseqarsinnaapput, piginnittullu nikinnerini akiligassanngortussaallutik.

Illuliortiternernut aningaasalersuineq pillugu inatsisit:

Illuliortiternernut aningaasalersuineq pillugu Inatsisartut peqqussutaat nr. 1, 7. maj 2007-imeersoq (1. juli 2007 atuutilerpoq)

 -Illuliortiternernut aningaasalersuineq pillugu Inatsisartut peqqussutaannut nassuiaatit

Illuliortiternernut aningaasalersuineq pillugu inatsisit atorunnaareersut, sulili ilaatigut pingaaruteqarsinnaasut:

Illuliortiternernut aningaasalersuineq pillugu Inatsisartut peqqussutaat nr. 4, 30. oktober 1998-imeersoq (1. juli 2007 atorunnaarsinneqarpoq)

 A: Inatsisartut peqqussutaat nr. 1, 21. maj 2002-meersukkut allannguuteqartinneqartoq (1. juli 2007 atorunnaarsinneqarpoq)

 B: Inatsisartut peqqussutaat nr. 5, 15. april 2003-meersukkut allannguuteqartinneqartoq (1. juli 2007 atorunnaarsinneqarpoq)